504
Мүнөөдэр, мартын 18-да Ородой Холбоото Уласай Юрэнхылэгшын һунгалтын үдэр, Буряад Уласай 14 һууринуудта «Болбосон түхэлтэй хотын оршон» гэһэн түсэлөөр олониитын газарнууд шэлэгдэхэ. Энэл үдэр Үдэ, Сэлэнгын эрье болбосон түхэлтэй болгогдохо талаар эрхим дизайн-проектын түлөө һунгалта үнгэргэгдэхэ. Буряад Улас дотор ажаһуугшад болбосон түхэлтэй болгогдохо165 газарнуудһаа шэлэн абаха. Тэрэнэй 95-ниинь – Улаан-Үдэдэ.
Буряад уласай аймагуудай Хяагта, Гусиноозёрск, Северобайкальск, Закаменск, Бабушкин хотонууд, Турунтаево, Кабанск, Выдрино, Селенгинск, Онохой, Каменск, Сагаан-Нуур, Загарай һууринууд «Болбосон түхэлтэй хотын оршон» гэһэн түсэлнүүдтэ хабаадана.
Тиихэдэ Северобайкальск хотодо «Железнодорожник», «Байкал» гэһэн соёлой байшануудта, Северобайкальскын хүүгэдэй урлагай һургуули, 5 дугаар гимнази, 1,3 дугаар һургуулинуудта, 6 дугаар Лицей, Эрхүүгэй гүрэнэй харгын холбооной болон шэнэ юумэ нэбтэрүүлгын технологиин ехэ һургуулиин таһагта һунгалта үнгэргэгдэхэ.
Хяагта хотодо анагааха ухаанай училищи, 4 дүгээр һургуулида Крупскаягай гудамжаар оршодог номой санда, ойн ажахын байшан, тамирай байшан, Сүхэ-Баатарай гудамжаар оршодог техникум болон хүүгэдэй сэсэрлигтэ ажаһуугшад дуугаа үгэхэ аргатай.
Гусиноозёрскын ажаһуугшад 1, 3, 4, 5, 6, 7 дугаар һургуулинуудта, Гусиноозёрскын гимнази, «Шахтер» гэһэн соёлой байшанда, «Россия» гэһэн сүлөө сагаа үнгэргэлгын хотын түбтэ ажаһуугшад һунгаха юм. Буряад Уласай барилгын болон гэр байрын ажахы шэнэдхэлгын яамаанай сайтда орожо, болбосон түхэлтэй болгохо газарнуудай тобьёг хаража болоно.
Һунгалтын үдэр «Болбосон түхэлтэй хотын оршон» гэһэн түсэлөөр һунгуулиин комисси үглөөнэй 8-һаа үдэшын 18 саг болотор ажалаа ябуулха. Эрхэтэдэй һунгаһан олониитын газарнуудта заһабарилгын ажал мүнөө зундаа хэгдэхэ юм.
