690
Ородой Холбоото Уласай Юрэнхылэгшын һунгалта Буряадта үглөөнэй 8 сагһаа эхилбэ. Буряадай дэбисхэртэ бүхыдөө 841 һунгуулиин газар ажалаа ябуулна.
Байгша оной январиин 1-нэй мэдээсэлээр, улас дотор 715 149 ажаһуугшад бүридхэлдэ абтанхай. Арад зомнай Юрэнхылэгшын тушаалда зууршалһан Сергей Бабурин («Ородой бүхы арадай эблэл»), Павел Грудинин (Ородой Холбоото Уласай коммунис нам), Владимир Жириновский (ЛДПР), Владимир Путин, Ксения Собчак («Гражданская инициатива»), Максим Сурайкин («Ород гүрэнэй коммунистнууд»), Борис Титов (Партия Роста), Григорий Явлинский («Яблоко») гэгшэдэй нэгэндэ дуугаа үгэхэ юм.
Мүнөө жэл түрүүшынхиеэ һунгуулиин газарай бүридхэлһөө тусхай данса абангүй, олон үйлэшэлгын түб гү, али “гүрэнэй хангамжа” гэһэн сайтда мэдүүлгэ оруулха арга байгаа.
Буряадай Олониитын танхим һунгалтын үедэ олониитын хиналта эмхидхэһэн юм. Буряадай Олониитын танхимай түрүүлэгшэ Баир Бальжировай урид хэлэһэнэй ёһоор, Ородой Холбоото Уласай «Ородой Холбоото Уласай Юрэнхылэгшын һунгалта тухай» гэһэн Федеральна хуулида Гүрэнэй Дүүмын болон Федерациин Зүблэлэй абаһан хубилалтануудай ашаар, можо нютагуудай олониитын танхимууд һунгалтын үедэ адаглагшадые томилхо эрхэтэй болоһон юм.
Ородой Холбоото Уласай Юрэнхылэгшэ һунгалта үнэн сэхээр үнгэрхэ ёһотой гэжэ зорилго табиһан байна гэжэ һануулнабди. Үнгэрһэн жэлэй сентябрь һарада Түбэй һунгуулиин комиссиин түрүүлэгшэ Элла Памфилова һунгалтын үедэ олониитын хинаха тухай дурадхал оруулжа, Ородой Холбоото Уласай можо нютагуудай Олониитын танхимай түлөөлэгшэд һунгалта хинаха болоо юм.
