​Буряадай оперо болон баледэй дуушад Михаил Пирогов, Эдуард Жагбаев эрхэтэдэй уялга дүүргэбэ

Ородой Холбоото Уласай Юрэнхылэгшын һунгалтада Буряадай оперо болон баледэй театрай түрүү дуушад Михаил Пирогов, Эдуард Жагбаев гэгшэд дуугаа үгэбэ.

Михаил Пироговай тэмдэглэһээр, мүнөөдэрэй һунгалтаар үдэр эхилбэ.

- Үглөөгүүр һэримсээрээ, һунгалтада хабаадаха тухай бодооб. Һунгуулиин газарта хүнүүд эдэбхитэйгээр ерэжэ, һунгалтада хабаадана. Энэмнай бидэндэ шухала үйлэ хэрэг ха юм. Манай дуунһаа гүрэн түрын болон уласай ерээдүйн байдал дулдыдана. Хүн бүхэн эрхэтэдэй уялга дүүргэхэ ёһотой, - гэжэ Михаил Пирогов хэлэбэ.

Михаил Пироговай суг хүдэлдэг Эдуард Жагбаев баһал иимэ һанамжатай.

- Ород гүрэнэй бүхы ажаһуугшадтай адляаар үдэрни эхилээ. Һунгуулииннгаа газарта ерэжэ, юрэнхылэгшын тушаалда зууршалагшадай дундаһаа түшэглэһэн хүнэйнгөө түлөө дуугаа үгөөб. Ажаһуугшадые һунгалтада хабаадахыень уряалнаб. Би өөрынгөө уялга дүүргээб, гүрэн түрынгөө хүгжэлтэдэ өөрынгөө хубитаяа оруулааб, - гэжэ Эдуард Жагбаев тэмдэглэбэ.