​Түмэн зоной түрүү, олон зоной орой

Ородой Холбоото Уласай Юрэн­хылэгшын һунгалта үнгэржэ, мартын 19-дэ Буряад Ула­сай Һунгуулиин комиссиин түрүүлэгшэ Дмитрий Ивайловский һунгалтын уридшалһан дүнгүүдые согсолоо.

Һунгуулиин комиссиин мэдээгээр, уласаймнай бүхы ажаһуугшадай 75 шахуу хубинь дуугаа үгэһэн байха юм. Диилэнхи дуу Ородой Холбоото Уласай Юрэнхылэгшэ Владимир Путин абаа, тэрэниие бүхы һунгагшадай 74 хубинь һунгаһан байна.

Сибириин федеральна тойрогой бүридэлдэ ородог 12 нютаг можонуудай дунда һунгалтада эдэбхитэй хабаадал­гын талаар Тыва Улас шалгараа, Кемеро­во можо - хоёрдохи һуурида, Буряад Улас гурбадахи һуурида гараа.

Буряад орондомнай Аха, Хори, Хэжэн­гэ, Хурамхаан аймагуудта эгээл эдэб­хитэйгээр һунгалта үнгэрһэн байна. Эндэ бүхы һунгагшадай 90-ээд шахуу хубинь дуугаа үгөө гэжэ уридшалан то­ологдоо.

Уластамнай 601 мянган хүн һунгалта­да хабаадаха ёһотой байгаа. Тэдэнэй 446 мянганиинь эрхэтэн уялгаяа бэелүүлээ.

- Саг үргэлжын адаглалга, шэнжэлгэ хэхэдэмнай, хүнүүд үглөөнэй 8 сагһаа һунгуулиин газарта ерэнхэй хүлеэжэ байгаа. Тиигэжэ 0,76 хубинь дары түр­гэн һунгаа юм. Энэнь урдахи һунгалта­нуудтай жэшэбэл, хоёр дахин дээшэлэн­хэй. Бүхыдөө хүн зон ехэ эдэбхитэйгээр хабаадаа, үдэрэй туршада һунгагшад таһалдангүй ерэжэл байгаа, - гэжэ Дми­трий Ивайловский мэдээсэбэ.

Ородой Холбоото Уласай Юрэнхылэг­шын энэ һунгалтада урданайхиһаа нилээд олон хүөн ерэһэн байна. Мүн ти­ихэдэ залуушуул ехэ эдэбхитэй хабаадаа.

- 35 хүрэтэр наһатай 130 мянгаад хүн хабаадаа. Залуушуулай хайша хэрэг хан­дахаяа болижо, гүрэнэйнгөө хуби заяа­гаар һонирходогынь, гүрэн соомнай юун боложо байнаб гэжэ һанаата болодо­гынь һайшаалтай. Гэбэшье, түрүүшын­хиеэ һунгалтада хабаадагшадай тоо үсөөн байгаа, энэ талаар ажал ябуулха хэрэгтэй, - гэжэ Дмитрий Ивайловский мэдээсэбэ.

Һунгуулиин участогуудта эгээл оло­ор Владимир Путинай болон Павел Гру­дининай түлөөлэгшэд байгаа. Буряад Уласай Олониитын танхим 348 хүниие эльгээгээ, КПРФ 536 хүниие адаглахы­ень табяа юм.

Һунгалта бүхэндэ ямар нэгэ дутуу дунданууд, хуули хазагайруулһан ушар­нууд заабол дайралдадаг гээшэ. Энэшье удаа эрхэтэдһээ 41 хандалга ороо. Гэбэшье, Дмитрий Ивайловскиин мэдээ­гээр, тон хуули хазагайруулһан гажа бу­руу ушарнууд баталагдаагүй.

- Ехэнхи ушарта ажалай ябасын та­лаар дары шиидхэхээр бага-сага асуу­далнууд байгаа. Һунгуулиин комиссиин ажалтанай муу ааша гаргаһан 3 ушар элирүүлэгдээ. Һунгагшадай бүридхэлэй талаар асуудалнууд гараа, гэбэшье зүб тээшэнь булта шиидхэгдээ, - гэжэ Һун­гуулиин комиссиин түрүүлэгшэ мэдээ­сэбэ.

Эдэ үдэрнүүдтэ Буряад Уластахи һунгалтын дүнгүүд гүйсэд согсологдо­жо, хоёр үдэрэй туршада Москва хото Ородой Холбоото Уласай һунгуулиин түб комиссида эльгээгдэхэ. Согсолог­дон бүридхэгдэһэн дүнгүүд Буряад Ула­сай Һунгуулиин комиссиин сайт дээрэ хэблэгдэхэ юм.