​Түгнэ-Галтайн дасанда шэнэ шэрээтэ

Мухар-Шэбэр аймагта оршодог Түгнэ-Галтайн дасанай шэрээтын шэрээдэ Вандан Будаевые һуулгаха ёһолол апрелиин 29-дэ түсэблэгдэнэ. Энэ ушараар эмхидхэлэй хорооной гэшүүд, тэрэ тоодо Буряад Уласай Арадай Хуралай һунгамалнууд бо­лохо Зоригто Цыбикмитов, мүн Бата Семёнов гэгшэд Вандан ламатай уулзажа, бэлэдхэлэй ажал ябуулга тухай хэлсэбэ.

Мухар-Шэбэр аймагай засаг даргын орлогшо Гэндэн Гени­нов, аймагай Һунгамалнуудай зүблэлые толгойлогшо Ольга Симухина гэгшэд энэ хэмжээндэ оролсоо. Тиихэдэ Түгнэ-Галтайн дасанай жиндагууд болохо нютаг һууринуудай түлөөлэгшэд - сомоной дарганар хабаадалсаа. Хошуун- Үзүүрһээ – Жаргал Иванов, Боомһоо – Бэликто Тыкшеев, Нарһатаһаа – Екатерина Эрдынеева, Хүсөөтэһөө – Баир Ба­заров гэгшэд дасанай хэмжээнүүдтэ хам оролсохоор бэлэн байһанаа мэдүүлээ. Илангаяа апрелиин 29 хүрэтэр дасанда залгалаа бодхоохобди гээд, Хүсөөтын сомоной дарга Баир Базаров үгэ үгэбэ. Тиихэдэнь Вандан лама иигэжэ мэдүүлбэ:

- Би саг зуура ерээ бэшэб. Тиимэһээ дасанайнгаа оршон тойронхиие бата бэхи болгохо хүсэлтэйб. Дасанай дотор болон гадар талыень дулаалха, дулаа оруулха, харша хорё­оень үргэдхэхэ гэхэ мэтын тоогүй ехэ ажал хүлеэнэ. Мүнөө дээрээ барилгашадта хэрэгтэй бүхы зэбсэгүүд худалдан абтаатай. Ламанарай байдаг нэгэдэхи гэр болбосон түхэлтэй болгохоһоо эхилээд, олоной хоол баридаг гэрэй орой шэ­нэлхэ саг тулажа ерэнхэй. Эдэ бүгэдые байгша ондо бүтээхэ хүсэл бии.

Энэ бүхы хэрэг олоной хүсөөр бүтэхэ гээд, Буряад Ула­сай Арадай Хуралай һунгамал Бата Семёнов нэмэбэ. Ушар тиимэһээ Түгнэ-Галтайн дасанай тусгаар жаса байгуулагда­жа, тиишэнь арга боломжоороо нютагай зон мүнгэ шэдэжэ эхилхэ юм. Жэшээлхэдэ, һара бүри 5 мянган түхэриг нэгэ хүн эльгээжэ байбалнь, жэлэй туршада 60 мянган түхэриг сугларшана бшуу. Буряад Уласай Арадай Хуралай һунгамал Зоригто Цыбикмитов эгээл тиигэхээр шадалтай зониие су­глуулжа, иимэ дурадхал оруулха болобо. Харин өөрөө Бата Семёновтой хамта һара бүри 5 мянган түхэриг дасан руу да­адхажа байха юм.

Гадна Түгнэ-Галтайн дасан өөрын ажахытай болохо юм. Тиигэхынь тулада нютагай ажахынууд 10-10 хони даадхаха болоо. Юрын жиндагуудшье хони дасандаа үргэжэ болоно. 100-гаад хонитой гүүртэ заатагүй байгуулхабди гээд, хүдөө ажахын талаар аймагай засаг даргын орлогшо Гэндэн Гени­нов тэмдэглэбэ.

Хүн хандиб үргэхэдөө, дасанда туһална бэшэ, харин өөртөө туһа хүргэнэ. Нютагай улад дасанаа хүрэжэ ерэхэ­дээ, нэн түрүүн сахюусадтаяа золгоно гүб даа. Тиигэжэ хам­гаалтадань хүртэнэ гээд, Вандан лама хөөрэлдөөнэй эсэстэ ойлгуулба. Шэрээтын шэрээдэ хүсэд һуугаашьегүй һаа, Ван­дан Будаев энэ жэлэй эхинһээ ехэ эдэбхитэй ажал ябуулжа байнхай. Түгнэ-Галтайн дасанай шэрээтын шэрээдэ Вандан ламые ёһотоор һуулгаха хэмжээндэ нютагаархид олоороо ерэхэл аабза гээд найдагдана. 

Дашима Цыдыпова

Авторай гэрэл зурагууд