843
Мүнөөдэр, мартын 22-то, Буряад уласай Засагай газарта Бүхэроссиин олимпиадын уласай шатада түрүү һууринуудые эзэлһэн һурагшадай шагнал баяр ёһололой оршондо үнгэргэгдэбэ.
Байгша ондо Бүхэроссиин олимпиадын уласай шатада һуралсалай 21 предмедээр 1200- һаа дээшэ һурагшад хабаадаһан байна. Буряад Уласай болбосоролой болон эрдэм ухаанай сайд Баир Жалсановай хэлэһээр, жэлһээ жэлдэ хабаадагшадай тоо олошорно, ургажа ябаһан улаан бургааһад эрдэм мэдэсэтэй болохоёо оролдоно.
- 2018 оной олимпиадада нёдондонойхидо ороходоо, 150-яар олон һурагшад хабаадаа. Бүхы һургуулинуудай 7-8-дахи болон 9-11-дэхи классуудта 21 предмедээр- федеральна, 4 предмедээр үндэһэтэнэй шэглээлээр олимпиада эмхидхэгдээ. Ород гүрэнэй хэмжээндэ һайн дүнгүүдые харуулхын тула оролдохо хэрэгтэй, - гэжэ Буряад Уласай болбосоролой болон эрдэм ухаанай сайд хэлэбэ.
Олимпиадын дүнгүүдээр 67 һурагшадта диплом барюулагдаа. Эдэнэй дундаһаа табан һурагшад федеральна хэмжээнэй олимпиадада уласаа түлөөлхэ юм. Болбосоролой һалбариин мэргэжэлтэдэй хэлэһээр, һурагшад Ород гүрэнэй олимпиадын түрүүшүүлэй тоодо орохо аргатай. Тиимэһээ Буряад Уласай Засагай газарта, болбосоролой болон эрдэм ухаанай яаманда энэ талаар ажал ябуулагдана.
- Бэлиг талаантай үхибүүдые дэмжэхэ талаар программа байгуулнабди. 61-дэхи лицей-интернадта бэлиг талаантай үхибүүдые элирүүлжэ, дэмжэхэ талаар уласай түб байгуулагдаха. Олоимпиадын ажал сагһаа сагта бэшэ, харин үргэлжэ ажал ябуулха хэрэгтэй гэжэ тэмдэглэлтэй. Тиихэдэ болбосоролой һалбарида амжалта туйлажа, Буряадай ниигэмэй-эдэй засагай һалбариин хүгжэлтэдэ хубитаяа оруулхат, - гэжэ сайд тэмдэглэбэ.
Олимпиадада илагшадай һанамжаар, ажабайдалай үргэн харгыда олоһон эрдэм мэдэсэ амжалтатай ябахадань туһалха, саашада бэрхэ мэргэжэлтэд урган гараха.
Бүхэроссиин олимпиадын уласай шатада Никита Таглохинов хоёр предмедээр илаһан байна.
- Би биологи болон ород хэлэнэй олимпиадада хабаадааб. Бүхэроссиин олимпиадада хабаадахын тула эрдэм мэдэсэ, зохёохы бэлиг талаан хэрэгтэй. Бидэ дүй дүршэлтэй болонобди. Федеральна хэмжээндэ амжалта туйлаха гэжэ оролдохобди, -гэжэ 63-дахи һургуулиин шаби Никита Таглохинов хэлэбэ.
Мэдээсэл:
Олимпиада һуралсалай жэлэй туршада һургуулиин, аймагай, уласай, федеральна – дүрбэн шатада үнгэргэгдэдэг. Түгэсхэлэй шатада түрүү һууринуудые эзэлэгшэд Ородой Холбоото Уласай ямаршье дээдэ һургуулида олоимпиадада хабаадаһан шэглэлээр, шалгалта барингүй орохо аргатай. Тиихэдэ Ородой Холбоото Уласай Засагай газарһаа тусхай шан барюулагдадаг юм.
Анна Огороднигой гэрэл зурагууд
