920
Буряад Уласай Засагай газарай Түрүүлэгшын аюулгүй байдалай талаар орлогшо Петр Мордовской түймэрэй аюултай хаһада бэлэдхэл тухай суглаа үнгэргэбэ.
Суглаанда уласай ойн ажахын агентствын, Ородой Холбоото Уласай Онсо байдалай талаар яаманай Буряадтахи хүтэлбэриин, Ородой Холбоото Уласай Баталан хамгаалгын яаманай Улаан-Үдын ойн ажахын хүтэлбэриин таһагай, Буряад Уласай байгаали ашаглалгын һалбарида хиналгын федеральна албанай хүтэлбэриин, байгаалиин уларил шэнжэлдэг түбэй хүтэлбэрилэгшэд хабаадаа. Видео-холбоогой ашаар аймагуудай засаг дарганар, аймагуудай сагдаанарай таһагай дарганар, түмэр сарагшадай хүтэлбэрилэгшэд баһал суглаанда хабаадаба.
2017 оной түймэрэй аюултай хаһын дүнгүүд болон байгша ондо хэгдэһэн бэлдэдхэлэй ажал тухай Петр Мордовской тоособо.
«2017 ондо түймэрэй гараһан түрүүшын үдэрнүүдтэ түргэн дары тэрэниие унтарааха талаар ажал нёдондонойхидо ороходоо, 13 хубяар дээшэлһэн байна. Ажалай, амаралтын гэнгүй, үдэр бүриин хиналтын ажал аша үрэтэй байгаа. Тиигэбэшье шиидхэхэ асуудалнууд олон», - гэжэ Петр Мордовской хэлэбэ.
Ойн ажахын һалбариин мэргэжэлтэд, хүтэлбэрилэгшэд албанайнгаа уялга хэр дүүргэнэб гэжэ хиналтада онсо анхарал хандуулагдаха тухай Буряад Уласай Засагай газарай Түрүүлэгшын орлогшо тэмдэглэбэ.
2018 оной түймэрэй аюултай хаһада бэлэдхэлэй ажалай дүнгүүд тухай уласай ойн ажахын агентствын хүтэлбэрилэгшэ Александр Мартынов хэлэбэ. Байгша оной мартын 12-һоо Буряад Уласай Толгойлогшын захирамжаар, ойн түймэр унтараалгын түсэб абтаа. Түймэр һэргылхэ талаар Буряадай ойн жасада авиа хиналта хэхэ 12 зам болон 109 адаглалагын пунктнууд байгуулагдаа.
Түймэрэй аюултай хаһын үедэ хагдаа ногоо галдаха, түүдэг носоохо талаар хэмжээнүүдые шангадхаха тухай 2017 оной һүүл багта Ородой Холбоото Уласай Засагай газарта абтаанхай гэжэ суглаанай үедэ Петр Мордовской онсо байдалай талаар уласай комиссин гэшүүдтэ һануулба. Түймэрэй аюултай хаһада хотонуудай, хүдөө нютагуудай газар дайдада гал түүдэг носоохо, хагда ногоо, бог шорой галдаха хоригдоно. Тала дайдаар хагда, поли дээрэ үлэһэн ногоо галдаха, гал түүдэг носоохо хорюултай. Үшөө тиихэдэ, харгын, түмэр харгын хажуугаар ногоо галдаха, түүдэг носоохо, модо отолһоной һүүлээр үлэһэн гэшүүһэ галдаха, хатанхай ой модо, һөөг бургааһа орхихо баһал хоригдоно.
Энэ дүримдэ хайша хэрэгээр хандабал, хүнүүд 3 мянгаһаа 4 мянган түхэриг хүрэтэр, албанай түлөөлэгшэд – 15 000-һаа 25000 түхэриг хүрэтэр, юридическэ нюурнууд – 150 мянганһаа 250 мянган түхэриг хүрэтэр ялада тохогдохо юм.
