730
Буряад Уласта нютагай засагай байгууламжануудта засаг дарганарые һунгаха тухай «Нютагай өөһэдын хүтэлбэриин эмхидхэл» гэһэн хуулида заһабари оруулха тухай Буряад Уласай Толгойлогшо Алексей Цыденов дурадхаба. Апрелиин ээлжээтэ сессидэ Арадай Хуралай һунгамалнууд энэ хуулиин түсэлөөр хэлсэхэ юм. Хуулиин абтабал, аймагуудай хүтэлбэрилэгшэдые хоёр аргаар һунгаха арга байгуулагдаха. Нэгэдэхеэр, хүн зон аймагай засаг даргые һунгаха, хоёрдохёор, аймагай һунгамалнуудай зүблэл конкурсын комиссиин дурадахалаар тушаалда зууршалагшадһаа шэлэн абаха юм. Засаг даргые яажа томилхо тухай нютагай засагай байгууламжын дүримдэ баталагдаха ёһотой.
«Федеральна хуулиин ёһоор хубилалтанууд оруулагдана. Аймагуудай засаг дарганарые һунгаха арга хадаа нютагай засагай байгууламжануудта зохихо аймагай хүтэлбэриин эмхидхэлэй түхэл болоно», - гэжэ Буряад Уласай Толгойлогшын болон Засагай газарай захиргаанай хизаар дайдаа хүгжөөлгын хорооной түрүүлэгшэ Баир Жамбалов хэлэбэ.
Тиихэдэ зарим нютагай засагай байгшууламжануудта ганса нэгэ аргаар хүтэлбэрилэгшэ томилогдодог юм. Буряад Уласай ниислэл хото – Улаан-Үдэдэ засаг дарга гансал һунгалтын хүсөөр томилогдохо. Аймагуудай һомонуудта захиргаанай үгы байбал, аймагай дүримэй ёһоор, аймагай захиргаан тэрэ үүргыень дүүргэдэг ушарта нютагай засагай байгууламжын хүтэлбэрилэгшын тушаалда һунгамалнуудай зүблэлэй гэшүүд томилдог. Уласай Загарай болон Багдарин нютагай засагай байгууламжануудта һомонуудай хүтэлбэрилэгшэдые һунгамалнуудай зүблэлдэ шэлэн абадаг. Тэрэшэлэн аймагай бюджедэй мүнгэн аймаг дотор удха шанартай асуудалнуудые шиидхэлгэдэ дамжуулагдадаг байха юм.
Мүнөө дээрээ Ородой Холбоото Уласай 20 можо нютагта аймагай хүтэлбэрилэгшые һунгаха хоёр арга бии. Ород гүрэнэй 33 можо нютагта нютагай засагай байгууламжын хүтэлбэрилэгшые конкурсын комиссиин дурадхаһан тушаалда зууршалагшадай тооһоо аймагай һунгамалнуудай зүблэл шэлэн абадаг юм. Гүрэн түрын 20 можо нютагта аймагай хүтэлбэрилэгшын тушаалда нютагай засагай байгууламжын захиргаанай түлөөлэгшэд томилогдодог.
