​Хэрэг шүүгшэд ажалайнгаа дүн гаргаба

Мартын 22-23-ай үдэрнүүдтэ Буряад Уласай хэрэг шүүгшэд үнгэрэгшэ жэлэйнгээ ажал тухайгаа тоособо. Суглаанай эхин­дэ Буряад Уластахи ахамад федеральна инспектор Сергей Ро­махин шүүгшэдэй орёо хүндэ ажалыень сэгнэжэ, ажалдаа мэдээсэлгын оньһото хэрэгсэлнүүдые ашаг үрэ ехэтэйгээр хэрэглэн хүдэлдэгыень тэмдэглээ.

Буряад Уласай Засагай газарай Түрүүлэгшын орлогшо - Буряад Ула­сай Толгойлогшын ба Засагай газа­рай захиргаанай хүтэлбэрилэгшэ Баир Цыренов мүнөөнэй хатуу сагта шүүхын газарнуудай хэрэгтэйень онсолоод, тэдэниие хүгжөөхэ, мүн ажаһуугшадай эрхэ хуулиин талаар мэдэсэ дээшэлүүлхэ тухай хэлээ.

Буряад Уласай Юрэнхы шүүхын газарай түрүүлэгшэ Альбина Кириллова тоосоходоо, ажаһуугшаднай шүүхын газарнуудта ба шүүгшэдтэ этигэл найдалтай байдаг гэжэ он­солоо. Гэбэшье дутуу дунданууд байнгүй яахаб. Шүүгшэдэй ажалдаа харюусалга ехэтэйгээр хандахынь, ашаг үрэтэйгөөр хүдэлхын тула хэ­дэн дурадхалнуудые оруулаа.

Буряадай Арбитражна сүүдэй түрүүлэгшэ Андрей Зуевай тоосоһоор, нёдондо уласай Сүүдэй департаментын хүтэлбэри мэр­гэжэлтэдэй, зөөриин-оньһон хэрэгсэлнүүдэй, мэдээсэлгын, сан жасын талаар байдал һайжаруулха ажалаа үргэлжэлүүлээ юм. Энэнь ху­ули сахигшадай хүдэлмэридэ һайн нүлөө үзүүлнэ.

Сүүдэй департаментын хүтэлбэри 3 хотын, 18 аймагай, сэрэгэй 2 гарнизоной, 54 эхин шатын шүүгшэдэй сүүдүүдые хангана. Тиихэдээ федеральна бюджедһээ ороһон мүнгэ зүб мүрөөр хэрэглэхэ гэжэ оролдо­но. Уласай шүүхын газарнууд тус хүтэлбэритэй суг хамта хэдэн хэм­жээ абажа, зориһондоо хүрэжэ ша­даа.

Һүүлэй жэлнүүдтэ олзын хэрэг эрхилэгшэдэй ба эмхи зургаану­удай шүүхын газарта хандахань олошороо. Энэнь юу гэршэлнэб гэ­хэдэ, илангаяа арбитражна сүүдтэ хандахада, мүнгэн зөөридэ, эдэй за­сагта хабаатай арсалдаанууд ашаг үрэтэйгөөр шиидхэгдэнэ.

Хоёр үдэрэй туршада үнгэрһэн суглаанай ехэнхи сагыень семинар­нууд эзэлээ. Эндэ шүүгшэд бэе бэе­тэеэ дүй дүршэлөөрөө хубаалдахын хажуугаар, шүүгшын ажалда ушар­даг элдэб янзын бэрхэшээлнүүдые, шиидхэгдээгүй асуудалнуудые зүбшэн хөөрэлдөө.

Суглаанай эсэстэ 2017 оной эрхим шүүгшэд болон шүүхын газарнууд шагнагдаа. Тиин эрхимүүдэй тоодо Мухар-Шэбэр аймагай, Улаан-Үдэ хо­тын Советскэ хороогой сүүдүүд ороо. Харин эрхим судьягай нэрэ зэргэдэ Буряад Уласай Юрэнхы шүүхын га­зарай Соном Габаев, Ирина Мирзае­ва, Полина Назимова, Буряад Уласай Бэшүүр аймагай судья Наталья Ха­римаева, Буряад Уласай Кабанскын аймагай сүүдэй түрүүлэгшэ Ири­на Суворова, Улаан-Үдэ хотын Со­ветскэ хороогой сүүдэй судья Баир Бадашкеев, Октябрьска хороогой сүүдэй 4-дэхи участогай эхин шатын шүүгшэ Ирина Зимина, Загарай ай­магай сүүдэй 2-дохи участогай эхин шатын шүүгшэ Лариса Аюшеева, Буряад Уласай Арбитражна сүүдэй судьянар Александра Пунцукова, Вера Филиппова гэгшэд хүртэбэд. Бултандань дипломууд ба шангууд барюулагдаа. Тиихэдэ шүүхын га­зар бүхэн мэргэжэлтэдэйнгээ дунда эрхимүүдые элирүүлжэ шагнаа.