​Израиль уласта Буряадаа түлөөлнэ

Буряадай эдир сурбалжалагшад Израиль гүрэндэ үнгэрһэн бэлигтэй үхибүүдэй “Калейдоскоп” гэһэн уласхоорондын фестиваль– харалганда хабаадана. Дари, Аня, Цырен гурбан шэлэн абалгын шанга дабаануудые дабажа, энэ ехэ хэмжээ ябуулгада хабаадаха эрхэдэ хүртөө юм. Израиль Улас ошохынгоо урда тээ тэдэнэр багша­таяа Буряад Уласай Толгойлогшын ба Засагай газарай Захиргаанай хүтэлбэрилэгшын хэблэл мэдээсэлэй бодолгын талаар орлогшо Ирина Доржиеватай уулзаба.

Ирина Нимажаповна эдир сур­балжалагшадта иимэ бага наһанһаа өөртөө дуратай мэргэжэл шэлэжэ ябаһандань баярые хүргэбэ.

- Сэхыень хэлэхэдэ, ехэ ажал ябуулжа байнат. Хэлэнүүдые шу­далхада, ехэ һайн гээшэ. Энэ фести­валь-харалганда хабаадалгатнай саашанхи ажабайдалдатнай тон һайнаар нүлөөлхэ. Тэндэ дэлхэйн гүрэнүүдэй үхибүүдтэй танилса­жа нүхэсэхэт, танай эрдэм мэдэсэ үргэдэхэ. Буряад Уласаа, буряад ара­даа түлөөлжэ, олон арадуудые түрэл нютагтаяа танилсуулха аргатайт. Энээндэтнай ехэ амжалта хүсэнэб, - гэжэ Ирина Доржиева тэмдэглээ.

Үхибүүд уласхоорондын энэ хэм­жээ ябуулгада ехэ харюусалгатайга­ар бэлдэбэ. Түрэл һайхан Буряад орон тухай видеобуулгабари бүтээжэ, тэндэ хүн зондо харуулха, буряад хэ­лэн дээрэ “Тоонто нютаг” гэһэн дуу дуулаха. Үхибүүдэй түрэлхид зорюу­та буряад хубсаһануудые оёжо үгөө. Буряад арад хэд гээшэб, ямар зан­шалтай, ямар ажабайдалтай гээшэб гэжэ харуулан танилсуулха ёһотой. Тиигэжэ үхибүүд үнгэтэ хадагуудые абаад, ямар үнгэ ямар удхатай гээ­шэб гэжэ хөөрэжэ үгэхэ. Мүн буряад арадай заншалта эдеэн болохо аар­са, боовошье абаашаха. Мүн тиихэдэ үхибүүд Буряад Уласайнгаа һүлдэ тэмдэг - туг абаад ошохо юм.

- Энэ тугнай бидэниие хамгаал­жа, зүб харгы руу шэглүүлхэ бшуу. Үхибүүд энэ фестивальда тон харю­усалгатайгаар бэлдээ. Тэдэ буряад, ород, англи хэлэн дээрэ дуугаржа ша­даха, мүн иврит хэлэ мүнөө шудалжа байна, - гэжэ Буряадай эдир сурбалжа­лагшадай холбооной хүтэлбэрилэгшэ Людмила Доржиева мэдээсэбэ.

Энэ эмхи “Бурятия молодая” гэһэн сонин хэблэдэг байна. Эдир сурбалжалагшад тэндээ элдэб һонин мэдээсэлнүүдые бэшэдэг. Тиин энэ сонинойнгоо дугаарнуудые абаад ошохо юм.

Гурбан эдир сурбалжалагшад Израиль Уласай табан хотонуудта үнгэрхэ “Калейдоскоп” гэһэн фести­валь-харалганай мэдээсэлэй албан­да хүдэлхэ. Дэлхэйн 8 гүрэнэй 25 хотоһоо ерэһэн бэлигтэй үхибүүдэй мүрысөөнүүд тухай тэдэ бэшэхэ. Жэшээнь, Дари эдир дуушадай ха­ралганда шүүгшэдэй гэшүүн боло­хо, Аня эдир хатаршадые сэгнэхэ, харин Цырен мэдээсэл тараадаг хэрэгсэлнүүдэй талаар ажаллаха юм.

- Би энэ фестивальда хабаадажа, дэлхэйн мэдээжэ сурбалжалагша­дай дүй дүршэлэй хэшээлнүүдһээ олон мэдээсэлнүүдые абаха зорил­готойб. Һонин хүн зонтой танил­саха, олон нүхэдтэй болохо, олон мэдээсэлнүүдые бэшэхэбди, - гэжэ Цырен мэдээсэбэ.

Үхибүүд табан үдэрэй турша­да фестивалиин ажалда хабаадаха үедөө Москвагай эдир сурбалжа­лагшадай мэдээсэлэй түб руу болон Улаан-Үдэ руу Интернет сүлжээгээр дары түргэн мэдээсэлнүүдые эльгэ­эжэ байха юм.

Буряадай эдир сурбалжалагша­дай холбоон байгуулагдаһаар 25 жэлэйнгээ ойн баяр тэмдэглэхэнь. Энэ хугасаада олон үхибүүдые сурбалжалагшын мэргэжэлэй оньһондо дүршүүлжэ, холо ойрын, уласхоорондыншье томо хэмжээнүүдтэ хабаа­дуулдаг болонхой. Энэ ниитэ эмхи­ин хүмүүжэмэлнүүдэй зариманайнь мүнөө үеын сурбалжалагшадшье болоод ябаһаниинь эли.

Буряадаймнай эдир сурбалжа­лагшадай холбооной үшөө зургаан эрхим гэшүүд май һарада Чувашида үнгэрхэ эдиршүүлэй мэдээсэл та­раадаг эмхинүүдэй уласхоорондын фестивальда хабаадаха юм. Уда­ань Казань хотодо үнгэрхэ Юрэн­хылэгшын дэмжэлтын Грантын хэмжээнүүдтэ хабаадаха. Мүнөө зундаа Монгол ороной “Найрам­дал” гэһэн уласхоорондын хүүгэдэй түбэй 40 жэлэй ойн баярта Буряадай эдир сурбалжалагшад хабаадаха юм. Арбан жэлэй туршада тэдэ нэгэшье алгадангүй, “Найрамдалда” зунай хаһада амараа юм. Хоёрдохи жэлээ Улаан-Үдын “Зорька” гэһэн хүүгэдэй лагерьта эдир сурбалжалагшадай хаһа үнгэрхөөр хараалагдана. Июль һарада Үбэр Байгалай хизаарта үнгэрхэ эдиршүүлэй медиа-форумдо хабаадаха юм.

Цырегма Сампиловагай гэрэл зураг