​«Хилэгүй балшар наһан»

Кирилл Комаров Ирина Алексеевна багшатаяа

Мүнөө жэл Ородой Холбоото Уласта «Союз пи­онерских организаций – федерации детских объединений» зүблэлэй эбигээл доро «Хилэгүй балшар наһан» гэһэн XX уласхоорондын хурал­даан үнгэргэгдэнэ. Түрүүшын шата хизаар, можонуудта боложо байна. Улаан-Үдэдэшье һаяхан Эдиршүүлэй уран бүтээлэй ордондо үнгэрбэ.

Буряадай Болбосоро­лой болон эрдэм ухаанай яаман, Улаан-Үдын болбо­соролой хороон, “Буряа­дай пионернүүд” нэгэдэл энэ хуралдаа эмхидхээ. Эндэ гүрэнэй олонии­тын эдиршүүлэй «Россиин һурагшадай хүдэлөөн» нэгэ­дэл хабаадаа.

“Буряадай пионернүүд” нэгэдэлэй түрүүлэгшэ А.В. Цыренжапов:

- Хуралдаанда Загарай, Ивалга, Кабанска, Тарбага­тай, Хори аймагуудай болон Улаан-Үдын һургуулинуудай, мүн нэмэлтэ һуралсалай һурагшад, оюутад хэдэн бүлэгүүдээр хубааржа хаба­адаа. Эгээл олон хүн – 101 хүбүүд ба басагад уран зу­рагай болон урлалай “Абья­ас бэлигтэй эдиршүүл” гэжэ урилдаанда байгаа. Эндэ “Үнгэтэ дэлхэй”, “Алтан гар”, “Өөрын гараар бүтээгдэһэн бэлэг”, “Уран дархашу­ул”, “Минии дуратай на­аданхай” гэжэ урилдаанууд үнгэргэгдөө.

«Эсэгэ оронойм амжал­тын арганууд» түсэлдэ 52 хүн хабаадаа. Тэдэнэр «Уг гарбалай таһаршагүй утаһан», «Хүн ба олонии­тэ», «Эсэгэ ороноо хамгаалжа һураха», «Эхэ орон, баатаршалга, алдар соло» болон бэелүүлэгдэһэн нии­гэмэй түсэлнүүдээр урилдаа. Мүнөөнэй эдиршүүл, залуушуул ямар хүндэтэйгөөр наһажаал зондо ханда­наб гэжэ хаража байхада, һанаанда ехэл һайн байгаа.

Мүн баһа «Байгаалиин нүхэд: бидэ – шишье, бишье!» түсэлдэ 39 һонирхолтой ажал табигдаһан байна. Эдэ ажалнууд ехэнхидээ Бай­гаали хамгаалгын жэлдэ зорюулагдаһан байгаа.

Дээдэ-Саянтын санатор­но һургуули-интернадай буряад хэлэнэй багша Ва­лерия Ширапова:

- Бидэ 7 шабинараа аса­раабди. Үхибүүднай 8 шэглэ­лээр хабаадажа, бултандань шангай һууринуудые аба­бабди. Дүрбэн хүмнай 1-дэхи һуури эзэлээ, үшөө 2-дохи, 3-дахи һууринуудые дүрбэ- дүрбэ дахин абаабди. Сарюна Одуева байгаали хамгаалгын түсэлдэ хабаадажа, байгаа­лиин литээр һонирхуулаа, өөрынгөө зохёоһон онтохо, найруулгануудаар шалгараа. Үйһөөр хэһэн зүйлнүүдээрээ, зурагуудаараа Арюна Цы­дыпова уран бэрхэеэ харуу­лаа. “Хүрдэ” бүтээһэн Цыден Балмаев, “Жабар үбгэниие” урлаһан Руслан Аюшеев баһал уран гартай байһанаа гэршэлээ. Снежана Дагбае­вагай “Түрүүшын хэмэл одо­нууд” бултанда һайшаагдаа.. Соёл Балтаков, Дарима Сам­буева, Света Лубсандаши­ева гурбамнай багашуулые наадуулха аргаараа булта­ниие һонирхуулаа. Тэбхэр хоридохи хуралдаагаар ха­баадагшадые амаршалхадаа, манайхид эгээл бэрхэнүүдэй эрхимүүд байгаа. Женя Са­молюк – уянгата шүлэгөөр, Дарима Самбуева ирагуу ду­угаар амаршалаа.

Валерия Ширапова

«Хүүгэдэй олониитын нэгэдэлнүүд» (24 хабаадагша), «Һайхан сэдьхэлтэй эди шэ­дитэн» (18 хүн) түсэлнүүдтэ хабаадаһан эдиршүүл хүн зондо, наһатайшуулда, ве­терануудта, илангаяа хүгшэдэй хамтын байрада, үншэдэй гэртэхи үхибүүдтэ туһалха нигүүлэсхы сэдь­хэлэй ажал яажа ябуулжа байһанаа хөөрэжэ үгөө.

“Байгалай одон” түсэлөөр Бабушкин хо­тын 56-дахи Мысовскайн һургуулиин Алёна Миро­нова, Таня Слоботанина волонтёрнууд:

- Ехэнхидээ түрэл бай­гаалияа, Байгал далайгаа хамгаалха хэрэгтэ хабаа­дадагбди. Тиигээд баһал Ветерануудай байшангай наһатайшуултай ходо уулза­жа, хөөрэлдэжэ, намтарынь һуража, бэшэжэ абанабди. Урданайнь гэрэл зурагуудые суглуулнабди, шүлэг дууну­удые зорюулжа, хатар на­ада харуулнабди. Тиимэһээ маанадайнгаа ерэхэдэ, аха захатамнай ехэ баярладаг. Халуунаар угтажа, үреэл юрөөлнүүдээр үдэшэдэг. Баһа нютагайнгаа ветерануудта түлеэ залһаарнь туһалнабди, зарим айл­да хашаа хүреэгыньшье хүбүүднай заһалсадаг, - гэжэ хөөрэнэд.

- Мүнөө энэ «Эсэгэ оро­нойм амжалтын арганууд» болон «Байгаалиин нүхэд: бидэ – шишье, бишье!» гэһэн түсэлнүүдтэ илаһан хүбүүд, басагаднай Москва эльгээгдэжэ, уласхоорондын хэмжээндэ Буряад ороноо түлөөлхэ. Тэндэ Бүхэроссиин хизаарнуудһаа гадна Казах­станай болон Беларусиин түрүүшүүлтэй тэмсэхэ. Ха­рин бэшэ түсэлнүүдээр илаг­шад дүхэриг шэрээнүүдтэ хабаадаха юм.

Сэнгэ Ринчиновэй гэрэл зурагууд