758
Буряадта олониитын комисси һунгалтын дүнгүүдые согсолжо, «Болбосон түхэлтэй хотын оршон байгуулга» гэһэн Юрэнхылэгшын түсэлөөр ажаһуугшадай эгээл олон дуугаа үгэһэн газарнууд элирүүлэгдэбэ. Уласай 14 һууринуудай олониитын 18 газарта заһабарилгын ажал хэгдэхэ юм.
Тиихэдэ Северобайкальск хотодо байгша ондо хотын паркда, Закаменск хотодо – Крупскаягай гудамжада аллея болон хоёр сквер, Турунтаево һууринда – залуушуулай стадионой сэсэрлиг, Гусинозёрск хотодо - «Барилгашадай» аллея болбосон түхэлтэй болгогдохо.
Улаан-Үдэдэ ажаһуугшад Карл Марксын бульвар, Загорскын «Молодежный» болон Кабанская гудамжаар оршодог «Заречный» гэһэн соёлой-сүлөө сагаа үнгэргэлгын түбэй сэсэрлигүүдэй түлөө һунгаһан байна. Буряад Уласай барилгын болон гэр байрын ажахы шэнэдхэлгын яаманай сайтда «Болбосон түхэлтэй хотын оршон байгуулга» гэһэн түсэлөөр заһабарилгын ажалнуудай хэгдэхэ олониитын газарнуудай тобьёгтой танилсажа болоно.
«Болбосон түхэлтэй хотын оршон байгуулга» гэһэн Юрэнхылэгшын түсэлдэ Улаан-Үдэ, Северобайкальск, Закаменск, Бабушкин, Хяагта, Гусиноозерск хотонуудай, Загарай, Онохой, Каменск, Селенгинск, Сагаан-Нуур һууринуудай, Кабанск, Выдрино, Мухар-Шэбэр, Турунтаево нютагуудай 64 мянганһаа дээшэ ажаһуугшад дуугаа үгэһэн байна. Эгээл эдэбхитэйгээр Сагаан-Нуур болон Северобайкальск хотонуудай ажааһуугшад хабаадаа гэжэ тэмдэглэлтэй. Бүхыдөө Буряад Уласай ажаһуугшад болбосон түхэлтэй болгогдохо олониитын 48 газарнуудһаа түрүүлэн заһабарилагдаха парк, сэсэрлигүүдэй түлөө һунгаба.
Хүн зоной амарха газарнуудые болбосон түхэлтэй болгохо талаар түсэлдэ 14 һууринуудай ажаһуугшадһаа 126 мянган мэдүүлгэнүүд ороһон байна. Ородой Холбоото Уласай Юрэнхылэгшэ Владимир Путин «Болбосон түхэлтэй хотын оршон байгуулга» гэһэн түсэл 2017 ондо дурадхаһан байна. Энэ программа 2020 он болотор бэелүүлэгдэхэ юм. 2018 ондо энэ түсэл Буряадта бэелүүлгэдэ 220 сая түхэриг һомологдоно.
Буряад Уласай Засагай газарай мэдээсэлэй албанһаа гэрэл зураг абтаба
