657
Буряад Уласай Засагай газарай Түрүүлэгшын эдэй засагай хүгжэлтын талаар орлогшо Игорь Зураевай хүтэлбэри доро ашагта малтамалнуудые олзоборилхо болон ойн ажахын һалбарида хүдэлхэ мэргэжэлтэдые бэлдэхэ талаар зүблөөн үнгэргэгдөө. Тус хэмжээ ябуулгада Буряад Уласай Засагай газарай гэшүүд, ойн ажахын, ашагта малтамалнуудые олзоборилхо эмхинүүдэй болон мэргэжэлтэдые бэлдэдэг дээдэ болон дунда болбосоролой эмхинүүдэй түлөөлэгшэд хабаадаа.
Залуушуул эрхим мэргэжэлтэд боложо хүдэлхын тула, Буряад Уласай болбосоролой эмхинүүд ойн ажахын болон ашагта малтамалнуудые олзоборилдог эмхинүүдтэй нягта харилсажа, һайн шанартай болбосорол олгохо талаар ажал ябуулха шухала гэжэ Игорь Зураев хэлэбэ.
Буряад Уласай болбосоролой болон эрдэм ухаанай сайдай орлогшо Галина Фомицкаягай тэмдэглэһээр, һуралсалай үедэ залуушуулда саашанхи ажалдань тон хэрэгтэй, эрдэм мэдэсэ олгохо, ажахын байдалда боложо байдаг хубилалтануудта дадалтай болгохо гээшэ болбосоролой һалбариин шухала зүйлнүүдэй нэгэн болоно.
Зүблөөнэй үедэ болбосоролой эмхинүүдэй тус һалбариин ажахынуудтай саашанхи ажал, дээдэ гарай мэргэжэлтэдые бэлдэхэ, ажалаар хангагшад ерээдүйн мэргэжэлтэдые һуралсалай үедэ ажалда дүршүүлхэ, һуралсалай программа хангаха, багшанарай мэргэжэл дээшэлүүлхэ, залуу мэргэжэлтэдэй WorldSkills Russia гэһэн мүрысөөндэ хабаадаха болон бусад асуудалнуудаар хэлсэһэн байна.
Ойн ажахын болон ашагта малтамалнуудые олзоборилхо һалбаринуудта мэргэжэлтэдые бэлдэхэ программам байгуулха, 2018 оной һүүл багта энэ асуудалаар уласай хуралдаан үнгэргэхэ тухай шиидхэбэринүүд зүблөөнэй дүнгүүдээр абтаһан байна.
Анна Огороднигой гэрэл зураг
