930
Буряад Уласай Засагай газарай Түрүүлэгшын ниигэмэй хүгжэлтын талаар орлогшо Вячеслав Цыбикжапов Агууехэ Илалтын 73-дахи жэлэй ойн баярта бэлэдхэлэй талаар зүблөө үнгэргэһэн байна.
Суглаанда яамануудай хүтэлбэрилэгшэд хэгдэжэ байһан ажал тухай хэлэбэ. Буряад уласай ниигэмэй хамгаалгын сайд Татьяна Быковагай хэлэһээр, апрелиин 1-нэй мэдээгээр улас дотор 9860-һаа дээшэ дайнай ветеранууд ажаһууна. Тэдэнэй 348-ниинь дайнда хабаадагшад болон дайнда эрэмдэгтэй болоһон хүнүүд, 6725 хүн – ажалай ветеранууд, 1898-ниинь – Эсэгэ ороноо хамгаалгын Агууехэ дайнда нүхэрөө алдаһан эхэнэрнүүд юм. Жэл бүри дайнай ветерануудта ниигэмэй туһа хүргэхэ талаар уласай болон федеральна бюджедһээ 148 саяһаа дээшэ түхэриг һомологдоно. Эсэгэ ороноо хамгаалгын Агууехэ дайнай ветерануудые гэр байраар хангаха талаар улас дотор программа бэелүүлэгдэнэ. 2008 ондо эхилһэн программаар 4392 хүн гэр байрын байдал һайжаруулһан байна. Энэ хэрэгтэ 3,8 миллиард түхэриг гаргашалагдаа юм. Байгша ондо федеральна бюджетһээ 14,4 сая түхэриг һомологдожо, 12 ветеранууд гэр байрын байдал һайжаруулха аргатай. Тиихэдэ дайнай ветерануудта эмнэлгын туһа хүргэхэ, эмүүдээр хангаха талаар ажал эрхилэгдэнэ.
Суглаанда хабаадагшад Илалтын үдэрэй баяр ёһололой хэмжээ ябуулганууд тухай хэлсэһэн байна. Зүблөөнэй дүнгүүдээр, Вячеслав Цыбикжапов уласай соёлой, элүүрые хамгаалгын, спорт болон залуушуулай бодолгын талаар, ниигэмэй хамгаалгын, болбосоролой болон эрдэм ухаанай яамануудта, Улаан-Үдэ хотын захиргаанда даалгабаринуудые үгэбэ. Тэрэнэй ёһоор, «Советскэ Союзай Геройнууд болон Алдар Солын орденой дүүрэн кавалернүүд» гэһэн антологидо хубилалтануудые оруулан, хэблэн гаргаха, Илалтын һайндэртэ зорюулан велоурилдаа үнгэргэхэ болон бусад хэмжээ ябуулганууд. «Һургуули бүхэндэ, класс бүхэндэ Эхэ орондоо дуратайгаар хүмүүжүүлгын хэшээлнүүдые үнгэргэхэ, сэрэгэй-тамирай наадануудые, зарница, квест-нааданууд, түсэблэжэ, ургажа ябаа улаан бургааһад үбгэ эсэгэнэрэйнгээ баатаршалга, эрэлхэг зориг тухай мэдэхэ болохо, омогорхол түрүүлхэ», - гэжэ Вячеслав Цыбикжапов хэлэбэ.
Анна Огороднигой гэрэл зураг
