721
Үнгэрһэн гарагай долоондо Буряад Уласай хүтэлбэрилэгшэ Алексей Цыденов болон Улаан-Үдэ хотын мэр Александр Голков ниислэл хотын ажаһуугшадтай Үндэһэтэнэй номой санда уулзаһан байна.
Хотын ажаһуугшад һанаата болоһон асуудалнуудаа уласай болон хотын хүтэлбэрилэгшэдтэ табижа, харюунуудые абаһан байна. Тиихэдэ газар хуулиин дансатай болгохо, хотын экологиин байдал, хүүгэдэй сэсэрлигүүдэй дутагдал, транспортын талаар болон бусад асуудалнуудаар эндэ хэлсэгдээ. Хотын ажаһуугшад газараа данса бүтээхэ гурим орёо бэшэ болгохо тухай дурадхаба. Буряадай хүтэлбэрилэгшэ Алексей Цыденов хуулиин саарһагүйгөөр, гэр табиһан газарнуудые дансатай болгохо талаар ехэ ажал хэгдээ, тиигэбэшье ажал үргэлжэлүүлэгдэхэ гэжэ тэмдэглэбэ.
«Эдэ газарнуудые хүнүүд дансатай болгожо шаданагүй. Уулзалгын дүнгүүдээр, энэ асуудалаар хэлсэжэ, хуулида хубилалтануудые оруулхабди. 2010 оной декабриин 31 болотор ажаһуугшад эзэмдэһэн газараа хэрэглэжэ байһан тухай гэршэлхэ дансануудай бүридхэл үргэдхэхэ арга бии. Мүнөө оруулһан дурадхалаар, ажал ябуулхабди», - гэжэ Буряад Уласай Зөөриин болон газарай харилсаанай талаар сайд Маргарита Магомедова хэлэбэ.
Александр Голковой хэлэһээр, газар хуулиин дансатай болгохо талаар нэн түрүүн Улаан-Үдэ хотын юрэнхы түсэбтэ хубилалтануудые оруулха хэрэгтэй. Эдэ хубилалтанууд һаядаа орулагдаха.
2018 ондо ехэ заһабариин хэмжээн дээшэлээ гэжэ уласай хүтэлбэрилэгшэ тэмдэглэбэ. 2018 ондо олон байратай 186 гэртэ 576 сая түхэригэй заһабари хэгдэхээр түсэблэгдэнэ.
Буряадай ниислэл хотын ажаһуугшад экологиин байдал тухай һанаата болоһоноо мэдүүлээ. Тэдэнэр Вахмистрово һууринай бог шорой обоолдог полигоной ажал тухай, фенолтой нуур, бузарлагдаһан агаар гэхэ мэтэ асуудалнуудые табиһан байна. Уласай хүтэлбэрилэгшэ Алексей Цыденов Трансмашхолдинг компанитай фенолтой нуур усадхаха, газар элдүүрилхэ тухай хэлсэһэн тухайгаа дуулгаба. Тэрэшэлэн Вахмистрово һууринда бог шорой обоолдог газарта түймэр сараха талаар штаб байгуулжа, ууяжа байһан галда уһа адхажа унтарааха тухай шиидхэбэри абтаһан байна.
Хотын агаарай бузарлагдаһан тухай, илангаяа үбэлэй сагта, хэдэн хэмжээнүүд абтаха. Нэн түрүүн, зохихо шиидхэбэри абахын тула агаарай бүридэлэй шэнжэлэлгэ үргэдхэгдэхэ. Алексей Цыденовэй хэлэһэнэй ёһоор, Буряад Уласай байгаалиин нөөсэнүүдэй яаманда 1,3 сая түхэригэй хэрэгсэлнүүд худалдан абтана.
Тиихэдэ үбэлэй сагта галаа түлеэгээр бэшэ, харин пелледүүдээр түлэдэг болохо гэжэ түсэблэгдэнэ. «Түлеэнэй орондо, пелледүүдые түлэхэ арга хараалнабди. Мүнөө дээрээ тэрэнэй сэн доошолуулха арга боломжо хаража үзэнэбди. Модо үйлэдбэрилэгшэд ой модоной үлэгдэлнүүдые усадхаха ёһотой, харин хибэдһэн эрхын талаһаа элирүүлэгдээгүй гэжэ тэмдэглэлтэй», - гэжэ уласай хүтэлбэрилэгшэ хэлэбэ. Экологиин журам эбдэһэн хотын аймагуудаар гүрэнэй шалгалтануудые үнгэргэхэ, хиналта эмхидхэхэ постнуудые олошоруулха дурадхал олониитэ оруулһан байна.
Буряад Уласай Засагай газарай хэблэлэй албанай гэрэл зураг
