​Арбан табан хүүгэдтэй ажалша бэрхэ бүлэ

Михаил Будаевич Жигжэма Дугаровна хоёр

Yндэр хада уулата Хурамхаан аймагай Гаарга ню­тагай Жигжэма Дугаровна Евреева Буряад оро­нойнгоо хүдөө ажахын хүгжэлтэдэ ехэхэн ху­битаяа оруулhан. Тэрэ 1945 ондо зулгы һайхан зунай сагта Гаарга һууринда Дугар Кушеевич, Жамсо Малакшинова Цыденовтэнэй бүлын эгээл одхон баса­ган боложо, алтан дэлхэй дээрэ мүндэлэн түрэһэн.

Бүхы наhаараа Гаар­гын совхозой hү hаалиин “Арзгуун” фермэдэ hаалишанаар ажаллаhан га­бьяатай. Энэ фермэдэ hаалишанаар хүдэлжэ, баян дүй дүршэлтэй болоhон Жигжэма эгэшэ сугтаа хүдэлhэн нүхэдтөө жэшээ харуулдаг, тэдэнээ hурган дахуулдаг байhан. “Арзгу­ун” фермэдэ хүдэлжэ байха­даа, ходо түсэбөө дүүргэдэг байгаа, нэгэ үнеэнhээ 2360 килограмм hү hааhан юм. Гуша гаран жэлэй туршада Гааргын совхоздо ажаллаха үедөө олон тоото грамота, хүндэлэлэй тэмдэгүүд, шаг­налнуудта хүртэһэн юм.

Наһанайнгаа нүхэр Ми­хаил Будаевич Евреевтэй суг хамта бүхэли наһаараа энэл ажахыдаа малай ажал­да ябаа.

Евреевтэн 15 үхибүүдые хүмүүжүүлжэ, гарыень ган­загада, хүлыень дүрөөдэ хүргэhэн, юhэн бүдүүн ба­атар хүрьгэдтэй, дүрбэн hайхан дангина бэри­нэртэй, дүшэн аша, зээ­нэрэй, зургаан зээнсэрэй хүгшэн эжы ба үбгэн аба хоёр болонхой. Жигжэма Дугаровна олон үхибүүдые түрэhэнэйнгээ түлөө “Эхэ-Герой” гэhэн үндэр нэрэ зэргэдэ хүртэhэн.

Евреевтэнэй гэр бүлэ

Михаил Будаевич 1937 ондо түрэһэн юм. Тэрэ хүшэр сагта эрдэм һуралсал хэхэ арга үсөөхэн лэ зондо тудадаг бэлэй. Хоёр лэ жэл һургуулида һураһаар, залуу хүбүүхэн хара багаһаа хам­тын ажалда ябажа эхилээ. Элдэб боро ажал хэжэ, трак­тористаар, һаалишанаар, малшанаар ажаллаһаар, наһанайнгаа 40 жэл түрэл колхоздоо зорюулаа. Эдэ жэлнүүдтэ хамтын ажалда хам оролсожо, шэн зориг гаргажа, ажалай олон га­бьяа туйлаһанайнгаа түлөө Михаил Будаевич Арадай Хуралай хүндэлэлэй тэм­дэгээр шагнагдаһан байха юм.

Эхэ эсэгын буян үри хүүгэдтэ гэжэ буряад зон дэмы хэлэдэггүй. Эхэ эсэ­гынгээ үргэмжөөр үри хүүгэдынь hургуули hудар шудалжа, ажабайдалайн­гаа үргэн харгыда гаража, гүрэн түрын ажал хэжэ, өөрынгөө нангин уялга дүүргэжэ ябанал даа.

Арбан табан хүүгэдынь аба эжынгээ ажалша бэр­хэ жэшээгээр хүмүүжүүлэгдэжэ, гэр бүлэ боложо түбхинэнхэй. Ажаһуудалдаа, гүрэн түрэдөө, тоонто нютагтаа туһатай мэргэжэлнүүдые шэлэнхэй юм. Тэдэнэй олонхинь - багша­нар, эмшэд, юрист, бухгал­тер мэргэжэлтэд. Хоёр зээ хүбүүдынь: Баяр Заятуе­вич Гармаев – физико-тех­ническэ эрдэмэй кандидат, Руслан Валерьевич Гатапов - Ородой бүхэ барилдагаар тамирай мастер.

Жигжэма Дугаровна Михаил Будаевичтай суг хамта 50 жэл ажаһуужа, 2016 ондо алтан түрэеэ на­яруулаа бэлэй. Үлзытэ энэ­эхэн юртэмсэдэ үглөө бүри нара угтажа, ажал хэжэ, үри хүүгэдээ хүмүүжүүлжэ, то­онто нютагтаа ажаһуухаһаа ондоо ямар һайхан юумэн байхаб даа. Гуламтынгаа гал унтараахагүй үнэр баян гэр бүлын уг дамжуулха үри хүүгэдэйнгээ амжалта, энхэ элүүр байдал хаража, баяр­тай ажаһууха гээшэ ёһотойл жаргал.