​Татьяна Колмакова – тусхай һургуулиин эрхим багша

Шангай һууринуудые эзэлһэн багшанар

Эрэмдэг бэетэй хүүгэдтэй хүдэлдэг багша­нарай эрхимүүдые элирүүлхэ урилда­ан үргэн дэлисэтэйгээр үнгэрөө.

Нээлгын баяр ёһололой үедэ Буряад Уласай Болбо­соролой болон эрдэм ухаа­най яаманай Нэмэлтэ, тусхай һуралсалай болон интер­надай эмхинүүдэй таһагай дарга Доржи Фролов: “Тус мэргэжэлтэ урилдаан хадаа багшанарта дүй дүршэлөөрөө андалдаха талмай боложо үгэнэ. Тэдэ эрэмдэг бэетэй хүүгэдые хүмүүжүүлгын, хүгжөөлгын асуудалнуудаар шэнэ мэдэ­сэтэй болоно, бэлиг шадаба­рияа гэршэлнэ бшуу. Урилда­анда хабаадагша бүхэн эндэ хараһан, үзэһэнөө хадуужа, һургалгын шэнэ аргануудые хэрэглэн хүдэлхэеэ оролдо­дог юм”, - гэжэ хэлээ.

Эдэмнай юрын һургуулинуудай багшанарта ор­ходоо, бүришье хүшэр, орёо, харюусалга ехэтэй ажалтай зон гээшэ ааб даа. Минии һанахада, үнэн зүрхэнһөө хүүгэдтэ дуратай, тэсэмгэй, сагаан сэдьхэлтэй хүн иимэ һургуулида хүдэлхэ ёһотой.

Эгээл иимэ багшана­рай нэгэн 8-дахи түхэлэй 3 дугаар тусхай һургуулида хүдэлдэг Татьяна Колмако­ва тус мүрысөөндэ илалта туйлаа. Татьяна Ниловна Улаан-Үдын индустриаль­но-педагогическа техникум дүүргээд, 15 дугаар лицей­дэ багшалжа эхилээ бшуу. Олон жэлдэ амжалта түгэс хүдэлжэ, “Буряад Уласай га­бьяата багша” гэһэн нэрэ зэргэдэ хүртөө.

“III түхэлэй тусхай һургуулиин захирал байһан Владимир Петрович Чан­цевай урилгаар иишээ ерэ­жэ, багшынгаа зам үргэлжэлүүлээб. Түрүүшэгээр штукатур-малярай мэргэ­жэлдэ һургадаг аад, жэл ошо­хо бүри бэе муутай хүүгэдэй олошорходо, эдеэ хоол ша­налгын хэшээлнүүдые за­ажа эхилээб. Багшанарай мэргэжэл дээшэлүүлгын дэ­эдэ һургуулида хоёр жэлэй туршада һуража, олигоф­ренопедагог мэргэжэлтэй болооб, - гэжэ Татьяна Ни­ловна хөөрөө. - Иимэ ажал шэлэһэмни түрүүшымни багшаһаа эхитэй гэжэ һананаб. Шабинартаяа үгэеэ ойлголсоод, тэдэнээ дэмжэ­эд, ажалаашье, хэшээлээшье сугтаа эбтэйгээр үнгэргэхэ гэжэ оролдодогбди. Манай һургуули дүүргэһэн үхибүүд Буряад Уласай эдэй засагай техникумдэ һурадаг.”

Багша хүн ходо сүлөөгүй байдаг: ажалынь барагда­ха бэшэ. Тиигээшье һаа, Та­тьяна Ниловна забда олоод лэ, хүүхэлдэйнүүдтэ бугааг, һубһа, мүн бүдөөр, шүрөөр элдэб янзын гоёолтонуудые хэхэ дуратай юм. Энэ бэлиг шадабарияа урилдаанай үедэ баһа харуулаа.

Хүнэй наһанда баяршье, гашуудалшье дайралдадаг, хүнгэншье, хүндэшье сагууд тохёолдодог. Наһанайнь нүхэр бүри залуугаар энэ дэлхэйтэеэ хахасаһан юм. Татьяна Ни­ловна гансаарханаа басагаяа үндылгэжэ, дээдэ мэргэжэл олгуулжа түбхинүүлээ. Баса­ганиинь мүнөө Сахалин хото­до хүүгэдтэ хатар заадаг юм. Хүрьгэнтэнэйнгөө ерэхэдэ, зээ хүбүүгээ эрхэлүүлжэ,одоо жаргадаг даа.

Эрхим багша ехэнхи са­гаа ажалдаа үнгэргэдэг, хүүгэдтэ бэеэ сүм зорюулдаг гэжэ эли. Хэшээл бүхэнөө тон һонирхолтойгоор, шаби­нарайнгаа ухаа һанаандань хадуугдахаар заажа шададаг гэжэ эли.

“Һургуулида хүдэлхэ гээ­шэ минии сэдьхэлдэ тон таа­рама. Хүүгэдэй юртэмсэ арю­ун сэбэр. Тиимэһээ би иишээ ерэхэ ехэ дуратайб”,- гэжэ Та­тьяна Ниловна хэлээ бэлэй.