​Угаа дахаһан ажалша бэрхэшүүл

Зүүн гарһаа: Солбон Садаев, Валентина, Владимир, Тимур Данжаловтан

Заха холын хада уулата Захаамин аймагта хэлхеэ холбооной ажалшад эгээл хүндэтэй зон гэхэдэ алдуугүй. Холбоогүй һаа, ямар ажал ябуулагдахаб гэжэ гүрэн түрэшье һайн ойлгожо, хэлхеэ холбоо­шодые али болохоор дэмжэдэг, урмашуулдаг. Тиимэһээ энэ ажалда хүбүүд, басагад ехэ дуратайгаар, ханамжа­тайгаар, оролдосотойгоор хүдэлдэг. “Модон үндэһэтэй, хүн угтай” гэдэгэй ёһоор, эндэ Захааминай Санагын хэлхеэ холбоошодой нэгэ уг тухай богонёоршье һаань, хөөрэхэмни.

1937 оной февралиин 16-да түрэһэн Тогтохо Дым­брылович Садаев ажалай амта үзэһэн, Совет арми­да алба хэжэ хүдэржэһэн хойноо Улаан-Үдын хэл­хеэ холбооной техникум ороһон. Энэ һургуулияа эр­химээр дүүргээд, 1970 онһоо таһалгаряагүй Санага нютаг­таа хүдэлөө. Мэргэжэлтэ ажа­лаа юрын монтёроор эхилээд, хэлхеэ холбооной инженер-механик боложо, нютаг соогоо хэлхеэ холбоо үргэдхэхэ ажал ябуулһан. Шэнэ оньһонуудые нэбтэрүүлхэ, хуушарһануудыень шэнэл­хэ ажал хэгдээ. Олон жэл соо нютагайнгаа АТС-ые даажа ябаа. Амжалтатай хүдэлһэнэйнгөө түлөө гүрэнэй ехэ шагналнуудта, “га­бьяата” солодо хүртэһэн ал­дартай юм.

Тогтохо Садаев хүдөөгэй малшадта ерээд байна

Зондоо хүндэтэй, оло­ниитын ажалда эдэбхитэй Тогтохо Дымбрылович Сана­гынгаа Сомон зүблэлдэ саг үргэлжэ һунгагдадаг байһан. “Коммунис ажалай отлич­ник”, “Социалис ажалай удар­ник” ходо ябаа, Ажалай Ула­ан Тугай орденой кавалер болоо (1986 оной июлиин 3-ай СССР-эй Верховно Со­ведэй зарлиг), “Ажалай вете­ран” медаляар шагнагдаһан габьяатай.

Тогтохо Дымбрыловичэй наһанай нүхэр Эльвира Цы­рен-Доржиевна нютагтаа почтальоноор ажалайнгаа намтар эхилһэн юм. Тиигээд лэ баһа наһаараа хүдэлөөд, “Эхын габьяа” болон “Ажа­лай ветеран” медальтайгаар наһанайнгаа амаралтада га­раа.

Эжы абадаа туһалжа яба- һан Виктория Тогтохоевна басаганиинь баһал мэргэ­жэлтэ һургуули 1983 ондо дүүргэжэ, Захааминай хэлхеэ холбооной таһагай оператор болоһон байна. Тиигээд Ута­ата нютагай хэлхеэ холбоо­ной таһагые даажа абаа һэн.

Тогтохо Дымбрылович Эльвира Цырен-Доржиевна хоёрой үшөө нэгэ Валенти­на Тогтохоевна басаган 1986 ондо Сибириин гүрэнэй хэл­хеэ холбооной ехэ һургуули (тиихэдэ электротехни­кум байгаа) дүүргээд, Захааминай хэлхеэ холбооной таһагта зайн галай меха­нигаар мүнөө болотор эр­химээр хүдэлнэ. Валентина Тогтохоевна олон тоото гра­мотануудаар, дипломуудаар, урмашуулгын шангуудаар, сэнтэй бэлэгүүдээр шагнаг­данхай.

Валентина Садаева оюутан ябахадаа

Садаевтанай Солбон Тог­тохоевич хүбүүн 1989-1991 онуудаар Ленинградта сэ­рэгэй алба гаража ерээд, эсэгынгээ гар доро монтё­роор ажаллажа, баян дүй дүршэлынь халажа абаа. Амжалта түгэс һураад, хэл­хеэ холбооной инженер болоо. Урагшаа һанаатай, ажалша Солбон Тогтохоевич хүдэлжэ байгаад, Сибириин гүрэнэй хэлхеэ холбооной ехэ һургуулида һуража, 2008 ондо эрхимээр дүүргээд, ам­жалта түгэс хүдэлжэ ябана.Тогтохо Дымбрылович Эльвира Цырен-Доржиевна хоёрой Валя басаган Влади­мир Данжаловта хадамда гаража, гэр бүлэ болоһон байна. Владимир Бадмае­вич Санагынгаа һургуули дүүргээд, жолоошоной һургуули ДОСААФ-ай шэглэ­лээр дүүргэжэ, сэрэгэй ал­банда мэргэжэлээрээ ябаа.

Владимир Бадмаевич 2002 оной февраль һарада Захааминай хэлхеэ холбоо­ной таһагай гаражда ажалда ороо. Тэрэл онойнгоо август­да жолоошон боложо, 2017 ондо наһанайнгаа амарал­тада гаратараа амжалта­тай хүдэлөө. Тиигээд Тимур хүбүүндээ жолоогоо дамжу­улаа.

Хэлхеэ холбооной һалбариин “Ростелеком” нэгэ­дэлдэ Садаевтанай угай долоодохи хүн – Тимур Данжаловай амжалтатай хүдэлжэ ябахань урматай байна.

Мэргэжэлтэ һайндэрөөрнь хэлхеэ холбооной ажал­ша Садаевтаниие халуунаар амаршалая.

Данжаловтанай гэр бүлын альбомһоо гэрэл зурагууд абтаба