1174
Буряад Уласай Арадай Хуралай ээлжээтэ сессидэ ТОС-уудта гүрэнэй тэдхэмжэ үзүүлхэ тухай хуули хоёрдохи уншалгада абтаба. Энэ асуудал Буряад Уласай Толгойлогшо Алексей Цыденов дурадхаһан байна. Мүнөө ТОС-уудта мүнгэн тэдхэмжэ үзүүлэгдэжэ, мэдээсэлэй болон методикын талаһаа туһа хүргэгдэхэ.
«Буряад Уласай ТОС-уудта гүрэнэй туһаламжа үзүүлхэ тухай» хуули хадаа ажаһуугшадай, уласай ТОС-уудай эдэбхитэдэй, өөһэдын хүтэлбэриин эмхинүүдэй оруулһан дурадхалнуудта үндэһэлэн бэлдэгдэбэ. Тус хуули бэлдэхэ үедэ улас дотор 178 дүхэриг шэрээнүүд үнгэргэгдэһэн байна.
Үнгэрһэн жэлэй хабар Буряад Уласай Толгойлогшо Улаан-Үдэдэ нютагай засагай байгууламжын хуралдаанда ТОС-уудай шэнэ шатада гараха тухай хэлэһэн байна.
«Шэнэ шатада гарахын тула ТОС-уудай ажаябуулга эрхын талаһаа бүрилдүүлхэ шухала. Тэдэнэр мүнөө грантын мүнгөөр ажалаа эрхилнэ. Тэдэнэрэй хуулиин эрхын талаар бүридхэлдэ абтабал, мүнгэн һомологдохо аргатай. Иимэ хуули абаха саг үни ерэнхэй», - гэжэ уласай хүтэлбэрилэгшэ тиихэдэ хэлэһэн байха юм.
Абтаһан хуулида улас дотор ТОС-уудай зорилго, тэдээниие дэмжэлгэ, Буряад Уласай Засагай газарай болон Арадай Хуралай ямар үүргэтэйб гэжэ тодорхойлогдобо. Иимэ хуули Ородой Холбоото Уласай Архангельска, Москвагай, Ульяновска можонууд болон Ненецкэ автономно тойрогто абтанхай гэжэ тэмдэглэлтэй.
Тобшо мэдээн.
Буряадай уласай нютагай өөһэдын хүтэлбэриин мэдээсэлээр, улас дотор 1702 ТОС-ууд байгуулагданхай. Тэдэнэй 12-ниинь юридическэ нюур гэжэ бүридхэлдэ абтанхай. «Эрхим ТОС» гэһэн уласай мүрысөөнэй илагшадые шагналгада жэл бүри 15, 30, 45 сая түхэриг һомологдоо. Байгша ондо 60 сая түхэриг һомолхо гэжэ түсэблэгдэнхэй. 2017 ондо мүрысөөндэ хабаадаха тухай 1164 мэдүүлгэ ороһон байна.
Анна Огороднигой гэрэл зураг
