1031
Буряадай гүрэнэй хүдөө ажахын академиин болон Зүүн Сибириин технологиин болон хүтэлбэриин ехэ һургуулиин оюутад эм домой ногоо ургуулха талаар дүршэхэеэ Ставрополиин хизаар гараха юм. Буряадай гүрэнэй хүдөө ажахын академидэ Юрэнхылэгшын грантнуудай жасын дэмжэлгээр Ород гүрэн дотор эм домой ногоо ургуулха, үйлэдбэрилхэ һалбарида «Моя мечта» гэһэн түрүү ажахы эмхидхэн байгуулагша Ирина Мининатай уулзалга эмхидхэгдэһэн байна.
«Хэр угһаа хойшо хүн түрэлтэн эмтэй, домтой ургамал мэдэдэг, хүнүүдэй ажаһууһан газарта бэеын тамирта туһатай ногоон ургадаг. Тэрэ тоодо, Буряадта. Эмтэй ногоо суглуулхадаа, бидэнэр ондоо онсо шухаг ургамалнуудые хюдажа болохобди. Тиимэһээ эм домой ногоо өөһэдөө ургуулха шухала», - гэжэ Ирина Минина хэлэбэ.
Ирина Минина «Моя мечта» компаниингаа ажал тухай, ямар аргаар ногоо ургуулжа, тэрэнээ үйлэдбэрилжэ, харин гүрэнүүдтэ худалдадаг тухайгаа хөөрэжэ үгэбэ.Энэ компнаи 50 мянган га талмайһаа ехэ газарта 30 янзын ногоо ургуулдаг байна. Тиихэдэ үшөө 150-яад янзын ургамал туршалгын талмайнуудта ургуулдаг. «Моя мечта» компани эмхидхэн байгуулагшын хэлэһээр, Ородой Холбоото Улас дотор газар үйлэдбэрилгын олзын хэрэг эрхилэлгэдэ эм домой ногоо ургуулха урагшатай байха.
Энэ уулзалгада оюутадай ногоо ургуулха һалбарида дүршэхэ тухай ганса хэлэгдээ бэшэ, тиихэдэ энэ һалбарида можо хоорондын хамтын ажал ябуулха тухай хэлсээ. Хоёр можонуудай газар үйлэдбэриин эмхинүүд энэ хэрэг дэмжэхээр бэлэн байһанаа мэдүүлээ.
«Ставрополиин хизаартай эрдэм, болбосоролой талаар ажалаа суг ябуулбал зохихо. Юундэб гэхэдэ, Буряадта эм домой зарим ногоон ургуулхаһаа байтагай, шэнжэлэгдээгүй ха юм. Буряад Уласай хүдөө ажахын болон эдеэ хоолой яаманда эм домой ногоо ургуулха һалбариин асуудалнууд хэлсэгдэнэ гэжэ мэдээжэ, тиимэһээ манай оюутад саашадаа ажалтайшье болохо гэжэ һананаб», - гэжэ Буряадай хүдөө ажахын академиин агрономическа факультедэй декан Бэликто Цыбиков хэлэбэ.
Байгша ондо Буряад Уласай хэдэн фермерскэ аажхынуудта туршалгын талмайнууд байгуулагдахаар түсэблэгдэнэ.
«Центр компетенций по созданию экологически устойчивой модели развития лекарственного растениеводства на Байкальской природной территории» гээһн түсэл Ородой Холбоото Уласай Юрэнхылэгшын грантын дэмжэлгээр бэелүүлэгдэнэ. Буряад Уласай Сэлэнгэ, Түнхэн, Аха, Хяагта, Ивалга болон бусад аймагуудта эм домой ногоо ургуулха һалбариин туршалгын талмайнуудые байгуулхаар бэлэн.
