​Эхэ байгаалияа аршалан хамгаалгын фестиваль Улаан-Үдэдэ үнгэргэгдэбэ

Байгша оной апрелиин 26-да Улаан-Үдын Хубисхалай талмай дээрэ “Харууһата Буряадни. Байгалиин волонтёр” гэһэн ниитэ гаршаг доро тусхай фестиваль олон зоной хабаадалгатайгаар үнгэргэгдөө.

Буряад Уласай Болбосоролой болон эрдэм ухаанай яаман олониитын эмхинүүдтэй хамта энэ хэмжээ харгалзалга дороо абаһан байна.

Буряад Уласай байгаалииин нөөсэнүүдэй яаманай таһагые даагша Антон Будуновай хэлэһээр, тус хэмжээ ябуулга хоёрдохиёо эмхидхэгдээ. Нёдондо жэлэйхидэ орходоо хабаадагшадай тоо дээшэлээ. Анхан Байгал шадархи федеральна хэмжээнэй Буряад ороной дэбисхэр дээрэ оршодог онсо харууһатай дархан газарнуудайл түлөөлэгшэд хабаададаг һаа, энэ удаа можо нютагуудһаа олон волонтёрнууд хабаадуулагдаа.

Фестивалиин гол зорилго волонтёрнуудай тоо олошоруулхаһаа гадна оршон тойронхи байгаалидаа һаад ушаруулангүй, хүнэй бодото байдалда хэрэглэгдэдэг полиэтиленовэ пакедүүд болон хууха амһартанууд, батарейкэ гэхэ мэтын тушааха түхеэрэлтэнүүд зохёогдоо. Полиэтиленовэ уута-пакедүүдэй орондо бүд эко-туулмагуудые хэрэглэхэ тухай болон бусад арга хэрэглэмжэнүүд олоной һонорто дурадхагдаа. Дунда һургуулинуудай шабинар эндэ хабаадажа, өөһэдын зохёоһон һонирхолтой түсэл, экоквестнүүдтэ эдэбхитэй хабаадажа, эрхимүүдынь шагнагдаха. Иигэжэ эмхидхэлэй хорооной гэшүүн Раджана Рыгзынова дуулгаа.

Буряад ороной дэбисхэр дээрэ оршодог байгаалиин онсо баялиг ан гүрөөл болон ургамалай оршон байдалые хамгаалжа, нарин нягтаар эхэ байгаалидаа хандахын ябадалда дээдэ һургуулинуудай оюутад, һурагшад хубитаяа оруулһан байна. “Джергинский”, Түнхэнэй, Үбэр Байгалай болон бусадшье онсо харууһатай дархан газарай түлөөлэгшэд тусхай талмайнуудые түхеэржэ, ябуулжа байһан ажалаа сугларагшадта дурадхаһан байна. Юуб гэхэдэ, элдэб шэглэлээр мастер-классууд эмхидхэгдээ, үхибүүдтэ нааданууд дурадхагдаа, баримтата һонин фото-үзэсхэлэн дэлгэгдэһэн байха юм.

Түрэл нютагайнгаа үзэсхэлэнтэ һайхан эхэ байгаалида онсо хандасатай байхын тула залуу үетэн һайн дураараа ажал ябуулжа, гамтайгаар хандахаһаа гадна, хамгаалан аршалжа, илангаяа зунай сагта амаралтын газарнуудта тусхай шэглэлээр хүдэлмэри эмхидхэхэ тухай тэндэ хэлсэгдээ.