1568
Улаан-Үдэ хотын 47-дохи һургуулиин залуу багша Тимур Очиров 2018 оной Буряад Уласай эрхим багша гэжэ тодорбо. 22-дохиёо эмхидхэгдэһэн энэ хэмжээ ябуулгада бүхы аймагуудай болон ниислэл хотын 28 багша хабаадаһан байна. Эрхимүүдэй эрхимүүдые амаршалхаа Буряад Уласай Толгойлогшо Алексей Цыденов ерээ.
Эрхим багшанарай мүрысөөн СССР-тэ оройдоол хоёр дахин болоһон түүхэтэй. Харин Буряадта тус хэмжээ ябуулга 1992 онһоо эхиеэ абана. 2000 он болотор оройдоол дүрбэ дахин эмхидхэгдээ бэлэй. Удаань жэл бүхэндэ үнгэрдэг заншалтай болоо. Бадма сэсэг эгээл түүрүүшын мүрысөөнһөө эхилжэ, тус хэмжээнэй һүлдэ тэмдэг болгогдоо һэн. Тиин эрхим багшада бадма сэсэгээр шэмэглэгдэһэн Кубок тусхайгаар дархалагдажа барюулагдадаг.
Буряад Уласай Толгойлогшо Алексей Цыденовэй хэлэһээр, ямаршье мүрысөөн шалгалта болоно ха юм.
- Таанад һурагшадһаа шалгалта абана гээшэт. Харин мүнөө өөһэдөө шалгалта тушаажа туршабат. Тиимэһээ энэ хэрэгтэ оролсоһон бултандатнай баярые хүргэхэ байнаб. Юуб гэхэдэ, иимэ мүрысөөндэ хабаадажа, ганса дүй дүршэлөөрөө хубаалдана бэшэт, мүн өөрыгөө шалгажа, мэргэжэлээ дээшэлүүлхэеэ ерээт гэжэ һанагдана, - гэжэ Буряадай Толгойлогшо тэмдэглээ.
Тус хэмжээ ябуулгада хабаадаһан бүхы багшанарые хараһан Алексей Цыденовэй “таанадта дурлашахаар” гэжэ хэлэхэдэнь, сугларагшад ехэ хүхижэ, шанга альга ташалгаар угтан абаа.
- Хүбүүн бүхэн һургуулиингаа багшада дурлаһан байдаг. Дэлхэй дээрэ иигэжэ дурлаагүй хүниие олохогүйт. Тиимэһээ энэ тайзан дээрэ байһан хабаадагшадта хододоо иимэ дорюун, һайхан ябахыень хүсэнэб, - гэжэ Буряадай Толгойлогшо хэлэһэн байна.
Арадай Хуралай һунгамалнууд, аймагуудай засаг дарганар, мүн үхибүүд болон түрэлхид түрүү багшараные амаршалхаяа олоороо ерээ.
Мүнөө жэлэй мүрысөөн бүхы аймагуудай түлөөлэгшэдые суглуулаа. Тэдэ тон түрүүн нютагтаа шалгаржа, Улаан-Үдэ хотодо бэлиг шадабарияа харуулха эрхэдэ хүртөө һэн. Тиигэжэ дүрбэн үдэрэй туршада шанга тулалдаануудта хабаадаһан байна. Мүрысөөнэй гуримаар багшанар багахан найруулгануудые бэшээ, танигдаагүй үхибүүдтэ хэшээлнүүдые үнгэргөө. Гол туршалганууд сооһоо түрэлхидэй суглаа эмхидхэлгын, багшанарай зүрилдөөндэ хабаадалгын шатануудые тэмдэглэмээр. Һонирхолтой даабаринуудай нэгэн гэбэл, классһаа гадуур ажал ябуулга болоно гэжэ һанагдана.
Хоёр шатын удаа табан эрхим багшанар үлөө. Тэдэнэй дүрбэниинь илагшад гэжэ тодороо. Эдэ хэд бэ гэбэл, Баргажанай һургуулиин англи хэлэнэй багша Елена Багаева, Кабанскын һургуулиин технологиин багша Владимир Суворов, Мухар-Шэбэрэй 1-дэхи һургуулиин информатикын багша Андрей Фёдоров болон Буряадай үндэһэтэнэй 1-дэхи лицей-интернадай түүхын багша Николай Фёдоров гэгшэд болоно.
Харин Гран-при шанда - Кубогта 47-дохи һургуулиин англи хэлэнэй залуу багша Тимур Очиров хүртөө. Тэрэ оройдоол 2014 ондо Буряадай гүрэнэй дээдэ һургуули дүүргэжэ абаһаар лэ, һургуулида хүдэлхөө ороо.
- Һуралсалаа түгэсхөөд, һургуулида хүдэлөөд үзэхэ юм байна гэжэ бодооб. Тиимэ ехээр багша болохоб гэжэ һанаашьегүйб. Зүгөөр абаһаар лэ һургуулида дурлашооб. Нэн түрүүн, үхибүүд намда өөһэдөө туһа хүргэжэ, найдал зосоом түрүүлээ. Иимэ бэрхэ һурагшадтай байһандаа омогорхоноб. Тэдэнэйл түлөө энэ ажалдаа үлэшооб, - гэжэ эрхим багша хөөрөө.
Тэрэнэй тэмдэглэһээр, мүрысөөнэй шата бүхэндэ бэрхэшээлнүүд дайралдаа.
- Мүрысөөндэ бүхы шатанууд хэды һонирхолтойшье һаа, угаа хүндэнүүд байгаа. Һүүлшын шатын дүхэриг шэрээдэ намайе сайдай орлогшотой зэргэлүүлээд һуулгажархидань, аймшагтай байгаа, хүлэрөөд абааб. Нэгэ хэды соо дуугарангүй һуутараа бэеэ баряад, хөөрэлдөөндэ оролсооб. Самбарай урда байбал, холо хүнгэн гэжэ һанааб, - гэжэ Тимур Евгеньевич мүрысөөн тухай энебхилэн хөөрэнэ.
Тимур Очиров түрэл һургуулидаа хэлэ бэшэгэй театр байгуулжа, олон үхибүүдые һонирхуулна. Бэлигтэй багшын шабинар элдэб янзын конкурс болон мүрысөөнүүдтэ амжалтатайгаар хабаададаг заншалтай.
Авторай гэрэл зураг
Автор: Борис БАЛДАНОВ
