​Залуушуулые нэгэдүүлхэ эмхи хэрэгтэй

Залуушуулай Бүхэсоюзна Ленинэй коммунис холбооной (ВЛКСМ) 100 жэл мүнөө намар тэмдэглэгдэхэнь. Буряадтамнай энэ түүхэтэ ойн баяр­та бэлдэлгын ажал ябуулагдана.

Уласай Засагай газарта үнгэргэгдэдэг заншалта брифинг дээрэ “Комсомолой ве­теранууд” гэһэн ниитэ эмхиин түрүүлэгшын орлогшо Александр Козлов бэелүүлэгдэжэ байһан ажал тухай мэдээсээ.

Комсомолой 100 жэлэй һайндэр манай гүрэндэ үргэнөөр тэмдэглэгдэхээр хараа­лагдана. Эмхидхэлэй хороон байгуулагдаа, Кремлиин дэргэдэхи Съезднүүдэй ордон соо үнгэрхэ тоглолто нааданда бэлдэлгые Иосиф Кобзон даажа абанхай.

- Энэ һайндэрые юрэ тэмдэглэхэ бэшэ, эдиршүүлые, залуушуулые комсомолецуу­дай жэшээ дээрэ хүмүүжүүлхэ зорилго та­бигдана. Уластамнай эмхидхэлэй хороон байгуулагдаа. Тэрэниие Буряад Уласай За­сагай газарай Түрүүлэгшын орлогшо Баир Цыренов залан хүтэлхэ, - гэжэ Александр Козлов тэмдэглээ.

Гадна бүхы аймагуудаарнай эмхидхэлэй хороонууд байгуулагдажа байна. Буряадай Комсомолой 90 жэлэй ойдо түүхэнь бэшэг­дээ бэлэй. Мүнөө саашаа үргэлжэлүүлэгдэхэ. Комсомолой ветерануудай эмхиин сайт байгуулагдажа, тэндэ бүхы мэдээсэлнүүд табиг­дана.

- ВЛКСМ-эй үгы хэгдэһээр, анханайхи­дал залуушуулые хүмүүжүүлгын ажал ябу­улагдахаяа болинхой. Комсомол гээшэ за­луушуулые нэгэдүүлхэ, хүгжөөхэ, зүбөөр хүмүүжүүлхэ зорилготой эмхи байгаа бшуу. Хүн гээшэ октябрёногһоо эхилээд, пионер, комсомол, парти гээд, бүхы шатыень гара­жа, комсомол болон партиин уряа доро бүхы һайн хэрэгүүд үүсхэгдэжэ, ехэ-ехэ барил­га, мүн һуудал байдал зохёолгын габьяата үйлэнүүд хэгдэжэ байгаа, - гэжэ тэрэ онсол­бо.

Үнэхөөрөөшье, комсомол залуушуулай хүдэлөөн асари ехэ ажал хэрэгүүдые бүтээжэ байгаа. Буряадтамнай ЛВРЗ-гэй барилга­да мянга хахад шахуу комсомолшууд хаа-хаанаһаа ерээд, ажал хэрэг эршэдээ. Тэдэнэй дунда шэн зориг харуулжа, Социалис Ажалай Геройнуудшье болоһон залуушуул байгаа. Гусиноозёрскын ГРЭС, Сэлэнгын ЦКК-гай барилгада баһал бүхы СССР гүрэнһөө ком­сомолшууд буужа, асари ехэ ажал эрхилээ. Тэрэ сагта залуушуулай урда үргэн харгы нэ­эгдэнхэй, тэдэндэ ажалшье хэхэ, һурахашье арга олгогдодог байгаа.

Буряадай комсомолой ветерануудай эмхи ЛВРЗ-дэ ажалладаг залуушуултай уул­залгануудые эмхидхээ. Энэ завод хадаа ха­рилсаа холбоотойгоор ажал ябуулдаг, дүй дүршэлөөрөө хубаалдадаг һургуулинуудтай. Һурагшадтайнь хүмүүжүүлгын, мэргэжэл­тэй танилсуулгын ажал ябуулдаг. Авиазаво­дой дэргэдэ “Взлёт” гэһэн залуушуулай эмхи байгуулагданхай.

- Мүнөө гүрэнэй залуушуулай бодолго­до анхарал хандуулагдадаггүйнь харамтай. Гэхэ зуура, Гүрэнэй Дүүмын үзэмжэдэ хуу­лиин түсэл оруулагданхай, зүгөөр хэншье тэрэниие зүбшэн хэлсээгүй, удаан сагта хэбтэжэл байна. Ородой Холбоото Уласай Юрэнхылэгшын тушаал эзэлһэнэйнь баяр ёһололой үнгэрхэдэ, энэ хуули баталагдахал бэзэ. Гэбэшье, тэрэ түсэлдэ олон юумэн ду­туу, хүсэд зүбшэгдөөгүй асуудалнууд олон, - гэжэ Александр Николаевич баримталба.

Комсомолой ветеранай мэдээсэһээр, Бе­ларусь Уласай жэшээ анхархаар: залуушуу­лай эмхи үнинэй байгуулагдаһан, амжалта түгэс ажалладаг. Энэ хадаа зүблэлтэ үеын комсомолой хүдэлөөнэй хараа бодол, ажал хэрэгүүдые дууряан, даган абаһан эмхи гээ­шэ.

Манай гүрэндэ байгша оной октябрь һарада комсомолой 100 жэлэй ойн баяр тэм­дэглэгдэхэ. Эгээ ехэ хэмжээ ябуулга октя­бриин 29-дэ Буряадай Гүрэнэй оперо болон баледэй театр соо үнгэргэгдэхөөр хараалаг­дана.

- Уластамнай залуушуулай хабаадал­гатай хэмжээнүүд гансал Улаан-Үдэ хо­тын гол талмай дээрэ үнгэржэ, тэрээнһээ саашаа гарадаггүй. Зүгөөр хаанашье за­луу хүдэлмэришэн гү, али малшан тухай бэшэгдэдэггүй, харуулагдадаггүй. Залуушу­ул болон дүршэл ехэтэй наһатайшуул хоо­рондоо ямаршье холбоогүй, - гэжэ комсомо­лой хүдэлөөнэй ветеран хэлэбэ.

Тэрэнэй тэмдэглэһээр, майн 19-дэ үнгэрхэ Пионериин үдэртэшье ганса хотын талмайнууд дээрэ дүрбэн намай шэглэлээр хубаарһан хэмжээнүүд үнгэрхэ. Тиимэһээ за­луушуулые нэгэдүүлхэ эмхи байгуулха асуу­дал амин шухала болоод байна.

Сүлжээ холбоонһоо гэрэл зураг абтаба