1757
Үнгэрһэн үдэрэй туршада Бабанта, Бэшүүр, Зэдэ, Загарай, Ивалга, Кабанск, Хэжэнгэ, Мухар-Шэбэр болон Байгал шадарай аймагта ойн 11 түймэр унтараагдаба.
2018 оной майн 4-нэй мэдээгээр, Буряадай дэбисхэртэ Бабанта, Бэшүүр болон Кабанск аймагуудта 560 га талмайда гараһан ойн гурбан түймэр сарагдана.
Бэшүүр аймагта 400 га талмайда гараһан түймэр сарагдаһаар. Тэрэниие унтараалгада Үбэр-Байгалай авиа ойн харуулай баазын прашютистнар-түймэр сарагшад, ойн харуулай хүдэлмэрилэгшэд, ой ашаглагшад – хамта зуугаад хүн хабаадаһан байна. Үнгэрһэн үдэрэй туршада түймэр саралгада бүхыдөө 350-яад хүн хабаадаа.
Тиихэдэ «ИСДМ-Рослесхоз» гэһэн замбуулинһаа саг үргэлжэ шалгалтын мэдээсэһээр, Бабанта аймагта хоёр түймэр соробхилһоор. Энэ түймэр һууринуудта аюулгүй, тэрэниие унтараалгада түймэрэй хойшолонгуудые усадхалгаһаа ехэ мүнгэн гаргашалагдаха ушарһаа онсо байдал усадхаха, һэргылхэ комисси саг зуура түймэр унтараахаяа болихо гэһэн шиидхэбэри абаһан байна.
Түймэрэй аюултай хаһын эхилһэнһээ хойшо 5,7 мянган га талмайда ойн 111 түймэр гараа гэжэ бүридхэлдэ абтаһан байна. Үнгэрһэн жэлдэ энэл сагай мэдээгээр, 112 мянган га талмайда 176 ойн түймэр гараа.
Буряад Уласай дэбисхэртэ түймэрэй аюулай онсо байдал соносхогдонхой. Онсо байдалай үедэ хагда галдаха хоригдоно. Эдэ дүримүүдые эбдэбэл, ажаһуугшад 4000-һаа 5000 хүрэтэр, харюусалгата нюурнууд – 25000-һаа 4500- хүрэтэр, юридическа нюурнууд 300000-һаа 500000 хүрэтэр ялада тохогдохо юм. Түймэрэй гараһан тухай дүтын ойн ажахыда гү, али (83012) 20-44-44 гэһэн утаһаар дуулгыт гэжэ ойн харуулшад хандана.
