2064
Ородой Холбоото Уласай газар дайдын ой баялиг гамнаха, хүгжөөхэ зорилготой Буряад Уласай ойн ажахын агентство «Бүхэросссиин ой модо тарилгын үдэр» гэһэн хэмжээ ябуулга 2018 оной майн 18-да үнгэргэхэ юм. Жэл бүри хабарай үедэ эмхидхэгдэдэг акцида уласай бүхы аймагууд хабаададаг.
2018 оной майн 18-да Тарбагатай аймагай Заудинска ойн ажахыда тус хэмжээ ябуулга үнгэргэгдэхэ. Ой модо тариха акцида 600 хүн хабаадахаар түсэблэгдэнэ. 2010 ондо ойн түймэрэй гараһан 50 га талмайда нарһанай 175 мянган сагдуул таригдаха.
«Бүхэроссиин ой модо тарилгын үдэр» гэһэн хэмжээ ябуулга үглөөнэй 11 сагһаа эхилхэ. Тиихэдэ түрүүн ойлгууламжын хүдэлмэри үнгэргэгдэжэ, ажалай хэрэгсэлнүүд тараагдаха. Удаань 11.30 сагһаа хоёр болотор ой модон таригдаха. Модо тарилгада хабаадагшадта хэмжээ ябуулга эмхидхэгшэд халуун эдеэ бэлдэжэ хооллуулха юм.
Хүн зон һайн дураараа «Бүхэроссиин ой модо тарилгын үдэр» гэһэн хэмжээ ябуулгада хабаадаха аргатай. Ажаһуугшад Уласай ойн ажахыда (301-2) 41-16-66; 41-03-28 e-mail: ohrana_ralh@mail.ru гэһэн утаһаар хандаха болоно.
Анна Огороднигой гэрэл зураг
