1661
Буряад Уласай аймагуудта Засагай газарай ехэ барилгын хүтэлбэри долоон фельдшерскэ-акушерскэ пунктнуудые байгша ондо бариха юм.
Захаамин аймагай Ехэ-Сахир, Ярууна аймагай Поперечное, Хэжэнгэ аймагай Хөөрхэ, Зэдэ аймагай Цагаан-Усун, Кабанск аймагай Корсаково, Бэшүүр аймагай Дунда Харлан, Байгал шадарай Югово һууринуудта бага эмнэлгын шэнэ газарнууд баригдаха юм.
Буряад Уласай «Элүүрые хамгаалгын һалбари хүгжөөлгэ» гэһэн программын хэмжээндэ уласай бюджетһээ мүнгэн һомологдожо, шэнэ эмхинүүд баригдаха. Апрель һарада Буряад Уласай Засагай газарта барилга хэхэ эмхинүүд элирүүлэгдэһэн байна. Хизаарламал харюусалгатай «Особняк», «СТИМ», «Логисттрансстрой» гэһэн бүлгэмүүд барилга ябуулха. 2018 оной апрелиин 30 болотор эдэ бүлгэмүүдтэй 31 сая түхэригэй хэлсээнүүд баталагдаһан байна.
135 дүрбэлжэн метр талмайтай, нэгэ дабхар бага эмнэлгын газарнууд баригдаха юм. Фельдшерскэ-акушерскэ пункт дотор терапевтын, эхэнэрнүүдэй эмшэнэй кабинедүүд, физиокабинет болон тарилга хэхэ кабинедүүд байха. Эдэнэр хадаа эмнэлгын хэрэгсэлнүүдээр хангагдажа, ажаһуугшадта эмнэлгын туһа хүргэгдэхэ. 2018 оной август һара болотор барилга хэгдэжэ, удаань эмнэлгын эмхинүүд ашаглалгада тушаагдаха юм.
