906
Майн 4-дэ Хори аймагай түбэй соёлой байшан дотор нютагаа нэрлүүлһэн Агуу дайнай болон Социалис Ажалай Геройнуудта зорюулһан аллей барилгада мүнгэ суглуулгын марафон үнгэрөө.
Агуу дайнда баатаршалга гаргаһан алдар суута Дарма Жанаев, Никифор Афанасьев, Константин Оцимик гэгшэдтэ, мүн Социалис Ажалай баатар гэһэн үндэр нэрэ зэргэдэ хүртэһэн Георгий Бимбаев, Николай Семёнов, Намжилма Тогмитова гэгшэдтэ зорюулhан хүшөө Хори тосхондо бодохо юм. Тиигэхын тулада аймагай бүхы эмхи зургаанууд хубитаяа оруулаа. Геройнуудай түрэлхид баhал мүнгэ суглуулжа, аллей барилганда нэмэри хэбэ. Дарма Жанаевай үри һадаһад 80 мянган түхэриг, Намжилма Тогмитовагай түрэлхид 110 мянган түхэриг суглуулһан байна. Мүнөө дээрээ 510 мянган түхэриг суглараад байна гээд, аймагай Ветерануудай зүблэлэй түрүүлэгшэ Долгор Цыреторова дуулгаба.
Аллей барилганда бүхыдөө 800 гаран мянган түхэриг гаргашалагдаха юм.
Светлана Батуева
