​Эрхим эрын наадандаа “Үльдэргэ” ажахы урина

Майн 12-то Ярууна аймагай Үльдэргэ нютагта «Эрхим эрын наадан» гэгдэһэн Адуушанай найр үнгэргэгдэхэнь.

Нёдондо “Үльдэргэ” ажахы урданайнгаа заншал һэргээн, Адуушанай найр үргэн хэмжээндэ эмхидхэжэ, олоной һонирхол татаһан байна. Яруунын дэбисхэр дээрэ оршодог 7 мянган адуунай арбан хубинь энэ ажахыда тоологдодог юм. Тиимэһээ нэгэ тээ эды олон адуу байлгаад, дэлһыень, һүүлыень тайраха, эмээллэхэ, эмниг моридые һургаха гэхэ мэтын шадабарияа хүбүүдэй харуулжа байхада, ехэ һүрөөтэй байгаа гээд, Ярууна аймагай засаг даргын орлогшо Абида Жамсуев тэмдэглэнэ.

Энэ хэмжээ тиихэдэ дээрэһээ дроноор буулгаад, Интернет сүлжээндэ тарааһаниинь, харагшад ехэ һонирхоһон байна. Эгээл тиимэһээ байгша ондо бүри олон зон хабаадаха гээд хүлеэгдэнэ.

“Үльдэргэ” ажахын захирал Булад Будажанаевай дуулгаһаар, үнгэрһэн жэлдэ Агаһаа хоёр команда,Буряадай аймагуудһаа 17 команда урилдаанда оролсоо. Харин энэ удаа аймагтаа түрүү гэжэ тоологдодог лэ команда урилдаанда оролсохо аргатай. Дүримэйнь ёһоор, 4 бэрхэ хүбүүд даага ургалаад, дэлһыень, һүүлыень хайшалха болоно. Тиигээд тамга табиха юм. Илаһан команда 50 мянган түхэриг, 2-дохи һуурида гарагшад – 30 мянган түхэриг, 3-дахи һуури абагшад - 20 мянган түхэриг шанда хүртэхэ.

Нёдондо энэ урилдаанай шүүгшэ байһан ажалай ветеран Даши-Цырен Дондоковой хэлэһээр, буряад зон адуу малаараа баяжажа, тэдэнээ хаража баясажа байдаг гээшэбди. Шуһан соомнай шэнгээтэй. Адуу малайнгаал ашаар ажамидаржа байгаа гүбди. Нёдондо ехэ тэмсээн болоо. Жэшээнь, Загустайн хүбүүд хэдыхэн секундаһаа боложо, 3-дахи һуурида гараа. Шуран хүбүүд байна гэжэ харааб. Мэдээжэ тамиршан Зоригто Цырендондопов адууе хүзүүнһээнь баряад, подсечкэ хээд лэ, унагаажа байна. Агын хүбүүдэй адуунда бэрхэ гээшэнь! Дээрэнь “мордошоно” бшуу гэхээр...

Энэ удаа “Морин дээрэһээ харбаха” гэһэн урилдаан эмхидхэгдэнэ. Ургаяа шэдэжэ, адуу бариха, саг соо эмээллэхэ, тэрээн дээрэ гаража, гүйдэл дундаа харбаха, мүн эмниг морин дээрэ хэр удаан һуунаб (родео) гэхэ мэтын урилдаанууд байха. Гадна мори урилдаан үнгэрхэ юм.

Октябрина Ешеевагай гэрэл зураг