628
Буряад Уласта эгээл ехээр алта угаадаг компанинуудай нэгэн болохо «Бурятзолото» нэгэдэл (уласхоорондын Nordgold компанида ородог) энэ жэл 2,1 миллиард түхэригөөр дээшэлүүлхээр түсэблөө. Энэнь 2017 онойхидо орходоо 23% дээшэлхэ болоно. Тиихэдээ 749 сая түхэригтэ хоёр уурхайн оньһон түхеэрэлгэнүүд шэнэлэгдэхэ. 109 сая түхэриг «Ирокинда» болон «Холбинский» уурхайнуудай алта угаадаг хэрэгсэлнүүдые шэнэлэн һэльбэлгэдэ шэглүүлэгдэхэ. Эдэ хэмжээнүүдэй ашаар 2017 ондо олзологдоһон 2,4 тонно алтанда ороходоо 2,9 тоннодо хүргэгдэхэ.
2018 ондо «Холбинский» уурхайда НТС гэжэ механизированна аргаар газарай нюруугай гүн руу орохо арга олгогдохо. Олдоһон ашагта малтамалнуудай ашаар уурхай үшөө удаан хүдэлхэ арга боломжотой болохо. «Ирокинда» уурхайда «Серебряковская» һудал саашаа малтагдаһаар байха. Мүн баһа «Случайная» болон «Медвежья» һудалнуудта ажал үргэнөөр ябуулагдана. Эдэ бүгэдэ ажалнууд «Ирокинда» уурхайн 5 гр/т алтатай нөөсые хүсэлдүүлхэ юм.
Мүн баһа 2018 ондо хуушанай болон шэнэшье нөөсэнүүдые саашадаа үргэлжэлүүлэгдэхэ шэнжэлэлгын хэрэгтэ 816 сая түхэриг шэглүүлэгдээ. Энэ хадаа нёдондонойхидо ороходоо 1% үшөө ехэ болоно. Хадын ажалнуудта 340 сая түхэриг шэглүүлэгдэхэ. Тиигэжэ алтанай нөөсэнүүдтэй газарай нюрууе урбуулха ажалнууд үргэлжэлүүлэгдэжэ, хадата газарта хэрэглэгдэхэ түхеэрэлгэнүүд баригдаха.
Nordgold компаниин операционно захиралай орлогшо, хуби ниилүүлһэн нээмэл «Бурятзолото» бүлгэмэй куратор Денис Рыжкин хөөрэнэ:
«Ажахыгаа үргэдхэхэ хэрэгтэ мүнгэ ехээр шэглүүлхэдээ, олзо оршомнай ехэдэхэ. Мүн баһа ажалшадайнгаа байра байдал һайжаруулнабди. Эдэ бүгэдын ашаар хэдэн жэл уридшалан ажал хэрэгэйнгээ урагшатай байхын түлөө оролдонобди. 2018 ондо манай шэглүүлһэн һан жаса «Ирокинда» и «Холбинский» уурхайнуудые хүгжөөхэ хэрэгтэ сэхэ хабаатай болоно. Тиигэжэ ажалай аюулгүйешье сахилгада анхарал ехээр хандуулагдана.
Мүн баһа «Бурятзолото» нэгэдэл ажалшадайнгаа байра байдал һайжаруулжа, элүүрые хамгаалгын ажал үргэдхэнэ. 2018 энэ хэрэгүүдтэ 64 сая түхэриг гаргашалагдаха. Энэ түсэлөөр “Ирокинда” уурхайн ажалшадта хамтын шэнэ байра баригдаха. Харин «Холбинский» уурхайда тамирай шэнэ танхим баригдахаар түсэблэгдөө.
2017 ондо «Холбинский» болон «Ирокинда» уурхайнуудта шэглүүлэгдэһэн мүнгэн хамта дээрээ 1,7 миллиард түхэригтэ болоо һэн. Гол түлэб энэ мүнгэн бэдэрэлгэ-шэнжэлэлгын, хадата газарнуудта хэгдэдэг ажалнуудые хүгжөөлгэдэ болон оньһон хэрэгсэлнүүдые шэнэлэлгэдэ шэглүүлэгдэһэн байха юм. Жэшээлэн хэлэбэл, нёдондо жэл хоёр уурхайнуудай оньһон хэрэгсэлнүүд 174 сая түхэригтэ шэнэгдэһэн юм”.
