1030
«ВКонтакте» гэһэн сүлжээн буряад хэлэндэ оршуулагдажа, хүн бүхэн хуудаһаяа буряад хэлэндэ оруулха аргатай болобо. Хубиингаа хуудаһанда “хэлэнүүд” гэһэн менюдэ орожо, буряад хэлэ шэлэхэ хэрэгтэй.
Буряад «ВКонтакте» гэһэн сүлжээ сайтын браузерта хэрэглэжэ болохо. Даб дээрээ Android болон iOS хабсаргалтануудта тааруулха арга боломжо үгы.
Олзын хэрэг эрхилэгшэ, блогер Дмитрий Александров иимэ үүсхэл гаргажа, урагшатай бэелүүлһэн байна.
- Энэ хэрэгтэ буряад хэлэнэй багшанар туһалаа. Тиихэдэ Буряад Уласай Болбосоролой болон эрдэм ухаанай яаман дэмжээ. Сайд Баир Баторович Жалсановта болон 29-дэхи гимназиин захирал Баир Кимович Шираповта һайниие хүргэнэб. Хэлэ бэшэг шудалагша Жаргал Бадагаров эгээл ехэ ажал бэелүүлээ. Һүүлэй хоёр жэлдэ Амгалан Даржаев болон Вячеслав Иванов һайн дураараа туһа хүргөө. Олон оршуулагшад хабаадаа. Бултандань баяр хүргэнэб! – гэжэ Дмитрий Александров хэлэбэ.
“ВКонтакте” сүлжээ буряад болгохын тула 30 мянган тухай үгүүлэлнүүд оршуулагдаһан байна. Энэ орёо ажал үргэлжэлүүлэгдэһээр.
- Оршуулганууд соо алдуунууд бии. Зарим үгэнүүд нютаг хэлэнүүдтэ оршуулагданхай. Олон үгэнүүд, бүхэли үгүүлэлнүүд нэмэгдэнэ, хубилгагдана. Алдуу олоо һаа, минии хуудаһанда бэшыт. Эдэбхитэй зондо оршуулагшын эрхэ олгохоб. Буряад хэлээрээ дуугараял! – гэжэ Дмитрий Александров уряална.
