​Сэрэгэй албантай нягта холбоотой

Буряад Уласай байгуулагдахатай сасуу удангүй сэрэгэй комиссариат бии болоһон. Эгээл тиимэһээ сэрэгэй комиссариадта наһаараа алба хэһэн Даши Данзанович Хандиров тухай зураглал уншагшадтаа дурадхахамнай.

Түнхэн аймагай Уляабар нютагта түрэһэн Даши Данзанович мүнөө жэлэй апрель һарада 85-дахи хабараа угтаба. Үргэн Буряад ороной али олон нютагуудта ажаһуудаг буряад айлнуудай түүхэ зарим тээгээ адлишуу байдаг. Юуб гэхэдэ, гушаад онуудай хамалган хашалган бүлэ бүхэндэ мүр сараа үлээһэн. Даши Хандировай Данзан абань лама угтай байһан тула хамалганда орожо, нютагаа бусаха аза талаангүй байшоо. Дари эжынь арбан хүүгэдые түрэжэ үндылгэһэн юрын буряад эхэнэрнүүдэй нэгэн юм.

Дайнай хатуу сагта, 1943 ондо Улаан Шанаа нютаг руу эжытэеэ, дүүнэртэеэ тэрэ нүүжэ ерэһэн түүхэтэй. Даши хүбүүхэн Зүүн Мүрэнэй һургуулида дүрбэн анги, удаань Тоородо долоодохиие дүүргэжэ, Улаан-Үдэ хото ерэһэн байна. Эндэ буряад һургуулида, мүнөө 29-дэхи юрэнхы болбосоролой дунда һургуули-гимнази гээд нэрлэгдэдэг һуралсалай газарта, эрдэм мэдэсэеэ үргэдхэжэ, 1953 ондо арбан класс дүүргэһэн байха юм. Удаань сэрэгэй албанда татагдажа, Эрхүүгэй сэрэгэй техническэ болон авиациин училищида (ИВАТУ) гурбан жэлэй туршада һуража гарахадаа, лейтенантын нэрэ зэргэтэй түгэсхөө. Училищи дүүргэхэлээрээ, залуухан Радна басагантай хуби заяагаа ниилүүлжэ, шэнэ айл бүлэ байгуулагдаа. Һуралсалаа дүүргэһэн залуухан мэргэжэлтэн хубаариин ашаар аяар холын Беларусь руу эльгээгдэжэ, тэндэ гурбан жэлэй туршада ажаллаһанай удаа нютагаа бусахадань, баһал тэрэ сагай эрхээр Якутск ошожо ажаллахаар эльгээгдээ бэлэй.

Даши Данзанович олон газарта хүдэлһэн намтартай.Тэндэ 1959-1963 онуудай хугасаада, удаань Онохойдо 1966 он болотор алба хааһан. Һүүлдэнь Красноярскда зенитно-ракетнэ полкдо 9 жэлэй хугасаада хүдэлхэ үедэнь Радна нүхэрынь ходо хажуудань ябалсаа. Оёдолшон мэргэжэлтэй хани нүхэртэеэ гурбан һайхан үринэрые үндылгэжэ, хүнэй зэргэ хүмүүжүүлээ. Батор хүбүүниинь инженер мэргэжэлтэй. Надежда Дашиевна бүхэли наһаараа экономистаар ажаллаһан, мүнөө наһанай амаралтада гаранхай. 1965 ондо түрэһэн одхон басаган Александра Дашиевна багша мэргэжэлтэйшье һаа, Улаан-Үдын Железнодорожно ба Советскэ районуудай сэрэгэй комиссариадта хүдэлһэн зандаа. Даши Данзанович Радна Дамбаевна хоёр дүрбэн аша зээнэртэй, нэгэ гушатай, үнэр баян айл бүлэ юм.

Даши Данзановичай наһанайнь намтар сэрэгэй комиссариадтай нягта холбоотой. 1976 онһоо 1982 он болотор Мухар-Шэбэр аймагта ба Железнодорожно сэрэгэй комиссариадта таһалгаряагүй хүдэлжэ, тэндэһээ хүндэтэ амаралтада гараһан юм.

“Манай хүдэлжэ байха үедэ саг ондоо байгаа. Наһаа хүсэһэн хүбүүдые сэрэгэй албанда татабари, бусажа ерэхэдэнь, тоо бүридхэлдэ абалга, дуудалгануудые гэр гэрээр тараалга, сэрэгэй частьнуудта абаашалга, асаралган гэхэ мэтын ажал ябуулагдадаг лэ һааб даа. Мүнөө үедэ сагнай тад ондоо болонхой. Бүхы ажал хүдэлмэри оньһото техникын ашаар хэгдэдэг болоһониинь һайшаалтай”, - гээд ахатан тэмдэглэхэ байна.

Буряад орондо сэрэгэй комиссариадай байгуулагдаһаар мүнөө 95 жэл гүйсэхэнь. Даши Данзанович Хандировай олон жэлдэ сэрэгэй комиссариадай албанда хүдэлжэ, оруулһан хубитань сэгнэшэгүй ехэ.

Сэрэгэй албанай ветеран, тушаалһаа бууһан майор нэрэ зэргэтэй аха захатан мүнөө үхи хүүгэдэйнгээ хажууда ажана тэнюун ажаһууна.

Оюна БАЗАРОВА