Алексей Цыденов: «Майн 9 – хэтын дурасхаалай үдэр»

Үсэгэлдэр, майн 9-дэ, Улаан-Үдэ хотын Соведүүдэй талмай дээрэ Агуу Илалтын туйлагдаһаар 73-дахи ойн баярта дашарамдуулан, парад үнгэргэгдэбэ.

Буряад Уласай Толгойлогшо Алексей Цыденов ветеранууд, хотын ажаһуугшад болон айлшадта хандажа, шэрүүн байлдаануудта ами наһаяа хахасаһан эрэлхэг баатарнуудые нэрэ, обогоорнь һанаха, дурсаха ёһотойбди гэжэ хэлэбэ.

«Ара талын ажалда Агуу Илалта шэрээлсэһэн хүнүүдые мартаха ёһогүйбди. Завод, хүдөө ажахын хүдэлмэринүүдтэ унаһан малгайгаа абаха сүлөөгүй ажаллаһан эжынэр, үхибүүд. «Бүхыгөө – фронтдо, бүхыгөө – Илалтын түлөө!» гэһэн уряа доро тэдэ хүдэлөө. Дайнай шэрүүн жэлнүүдтэ эм домһоо эхилээд, самолёт болон вагонуудаар дүүрэн хангажа шадаа. Буряад орондо үйлэдбэрилэгдэһэн вольфрам гурбадахи танк бүхэндэ хэрэглэгдээ», - гэжэ Алексей Цыденов тэмдэглэбэ.

Буряад Уласай Толгойлогшо хүршэ Монгол гүрэнэй сэгнэшэгүй туһа хүргэһэн тухай һануулба.

«Монгол гүрэнһөө мяха, нооһо дамжуулхаһаа гадна, суглуулагдаһан мүнгэ зөөриин ашаар авиациин эскадрили болон хэдын танкова колоннанууд бүтээгдээ. Хүршэ гүрэнһөөмнай хэдэн мянган зон һайн дураараа дайнда мордоһон. Тэдэ баатарнуудай үри һадаһад майн 9-нэй һайндэрые бидэнтэй суг хамта тэмдэглэдэг», - гэжэ уласай хүтэлбэрилэгшэ хэлэбэ.

Эсэгэ ороноо хамгаалгын Агууехэ дайнда хабаадаһан үбгэ эсэгэнэр, түрэл гарал тухайгаа дүүрэн мэдээсэл суглуулыт гэжэ Алексей Цыденов уряалба. Уласай хүтэлбэрилэгшын һанамжаар, «Хэтын жагсаал» болон шэрүүн дайнай жэлнүүд тухай үри һадаһадай һанажа ябаа һаа, үшөө олон жэлдэ арад зон нэгэдүүлхэ.

Мүнөө Буряад Уласта Эсэгэ ороноо хамгаалгын дайнда хабаадагшад болон эрэмдэг бэетэй болоһон 343 хүн, тиихэдэ ара талын хүдэлмэринүүдтэ ажаллаһан 6725 хүн ажаһууна. Эдэ зонуудта анхарал хандуулха манай гол зорилго болоно гэжэ Алексей Цыденов хэлэбэ.

Удаань Буряадта байрлаһан Зүүн зүгэй сэрэгэй тойрогой бүхэй сэрэгэй нэгэдэлэй захирагша генерал-майор Михаил Носулевэй хүтэлбэри доро парад эхилбэ.

Соведүүдэй талмай дээгүүр танкистнууд, ракетчигүүд, десантнигууд, связистнууд артиллеристнүүд болон «Юнармия» сэрэгэй хүдэлөөнэй түлөөлэгшэд алхалан гараба.

Тиихэдэ БТР-80 бронетранспортернууд, БРДМ-2 тагнуул хэдэг машинанууд, түргөөр буудадаг «Торнадо» системэ болон бусад мүнөө үеын эрилтэнүүдтэ харюусама түрүү техникэ сугларагшадай һонирхол татаһан байна.

Анха түрүүшынхиеэ Эсэгэ ороноо хамгаалгын Агууехэ дайнай үеын машинанууд харуулагдаа. Түүхэтэ автомашинанууд Соведүүдэй талмай дээгүүр гаража, олондо һайшаагдаа.

Бүхыдөө парадта 1,5 мянган тухай хүнүүд болон 50-һаа дээшэ сэрэгэй болон тусхай техникэ хэрэглэгдээ.

Анха түрүүшынхиеэ сэрэгшэдтэй хамта Буряад уласай театрнуудай зохёохы бүлэгүүд Эсэгэ ороноо хамгаалгын Агууехэ дайнда болоһон үйлэ хэрэгүүдые харуулаа.