750
Илалтын үдэр Буряад уласай ажаһуугшад Эсэгэ ороноо хамгаалгын Агууехэ дайнда ами наһаяа алдаһан хүнүүдые дурсажа, «Хэтын жагсаал» гэһэн бүхэроссиин хэмжээ ябуулгада хабаадаба. Ородой Холбоото Уласай Дотоодын хэрэгүүдэй яаманай Буряадтахи хүтэлбэриин мэдээсэһэнэй ёһоор, энэ хэмжээ ябуулгада 22 мянган тухай ажаһуугшад нэгэ мэтэ алхалан гараба. Тэдэнэй дунда Буряад Уласай Толгойлогшо Алексей Цыденов наһанайнгаа нүхэртэеэ, үхибүүдтэеэ хамта ябалсаа.
«Хэтын жагсаалда» алхалхадаа, Эсэгэ ороноо хамгаалгын Агууехэ дайнда хабаадаһан үбгэ, эсэгэнэрээ, түрэл гаралаа һанан дурсанабди. Илалтын үдэр тухай үри хүүгэдтээ, аша зээнэртээ омогорхон ябахыень дамжуулнабди. Энэ хадаа сэгнэшэгүй», - гэжэ Алексей Цыденов хэлэбэ.
Уласай хүтэлбэрилэгшын тэмдэглэһээр, үшөө олон жэлнүүдтэ «Хэтын жагсаал» арад зониие нэгэдүүлхэ. Эсэгын дайнда хабаадаһан түрэл, гарал тухайгаа мэдээсэлнүүдые суглуулыт гэжэ уласай хүтэлбэрилэгшэ ажаһуугшадые уряалба.
«Үнгэрһэн жэлдэ дайнда хабаадаһан түрэлхид тухайгаа шэнэ мэдээнүүдые олооб. Заатагүй үхибүүдтээ саашань дамжуулхаб», - гэжэ Алексей Цыденов хэлэбэ.
Байгша ондо анха түрүүшынхиеэ Монголой түлөөлэгшэд «Хэтын жагсаалда» хабаадаа гэжэ тэмдэглэлтэй.
Ород гүрэнэй бүхы можо нютагуудта, томо бага хотонуудта, хари гүрэнүүдтэшье «Хэтын жагсаал» үнгэргэгдэдэг. Эсэгэ ороноо хамгаалгын Агууехэ дайнда хабаадаһан сэрэгшэдэй гэрэл зурагуудые барин, хүгшэн залуугүй дурасхаалыень энэшье удаа мүнхэлбэ. Һүрөөтэй дайн бүхы гэр бүлэнүүдтэ хохидол асараа гэжэ энэ акци гэршэлнэ.
