​Үншэн хүүгэдтэ бүхы дураяа зорюулаа

Гран-придэ хүртэһэн Харинтанай гэр бүлэ

Уластамнай “Үргэжэ абаһан гэр бүлэ-2018” гэһэн мүрысөөн үнгэргэгдэжэ, хоёр үдэрэй туршада арбан гэр бүлэнүүд мүрысөө. Гурбанһаа олон үхибүүдые үргэжэ абаһан долоон бүлэ хоёрдохи шатада хабаадаа. Тэдээн сооһоо Андрей болон Татьяна Харинтан эрхим гэр бүлэ гэжэ элирүүлэгдэжэ, Гран-при шанда хүртөө юм.

Улаан-Үдэ хотын Шиш­ковко микрорайондо ажаһуудаг энэ айл удаан сагта үхибүүтэй боложо ядадаг һэн. Зургаан жэлэй үнгэрхэдэ, удаан хүлеэгдэһэн хүбүүн мүндэлбэ. Томо боло­жо эхилхэдээ: “Нүхэдни бул­та аха дүүнэртэй, би юундэ гансаараабиб?” - гэжэ ходол мүшхэжэ байдаг болоо.

Хүбүүнэй түрэлхидэй нютагай нэгэ айлай гурбан үхибүүд эхэ эсэгэгүй үлэжэ, үншэн хүүгэдэй байшан­да үгтөө. Харинтан одхон Нина басагыень абаха гэжэ Шэнэ-Бэрээнэй үхибүүдые элүүржүүлгын түб ошо­бод. Тэндэ гурбан хүүгэд гүйлдэжэ ерээд: “Бидэни­ие абахатнай гү? Хэзээ аба­ашахабта?” - гэжэ һуража һалабагүй.

- Хөөрхэн жаахан хүүгэдэй найдал дүүрэн нюдөөрөө сэхэ урдаһааш хараад, иимэ асуудалнуудые табижа байхадань яахабши? Бидэ нүхэртэеэ нэгэшье маргангүй, бултыень үргэжэ абаха гэжэ шиидээбди. “Эдэ үхибүүд үншэн хүүгэдэй гэр­тэ юу хэжэ байха юм?” - гэжэ нүхэрэйнгөө хэлэхэдэ, бүри зориг орооб, - гэжэ Татьяна хөөрэнэ.

Баяртай түрэлхид хоёр дабхар гэр соогоо нэгэ һүниин туршада үхибүүдтээ хэдэн таһалгануудые түхеэрээ. Данса саарһа бэлдэ­хэ ажалай үймөөн соо хэдэн шалгалта дабажа, одоошье хүлеэгдэһэн саг ерэжэ, 2015 оной мартын 11-дэ эб­тэй эетэй гэр бүлэ нэгэдээ юм. Үхибүүд номдоошье бэрхэ, дуу хатарта абьяастай, хоорондоо эбтэй, хүхюу зугаатай ажаһуудаг. Һаяхан гэрэй эзэн Андрей Анатольевич тэдэндээ бэ­лэг болгон, Байгал шадар гэр худалдажа абаа. Тии­гэжэ зундаа сэбэр агаарта хүүгэдээ элүүржүүлхэ арга­тай болоһондоо урматай.

Хүн бүхэмнай үхибүү үргэжэ абаха зүрхэтэй, сэдь­хэлтэй байдаггүй. Түрэһэн үхибүүгээ үлүү ехээр үмөөрэнгүй, хүнэй үриие газаашалангүй, адли тэг­шээр энхэржэ, ёһотой соонь хүмүүжүүлхэ гээшэ орёохон, ухаагаараа олон юумэ туйха хэрэгтэй. Тиимэһээ Андрей болон Татьяна Харинтан шэнги нигүүлэсхы һайхан сэдьхэлтэй зондо доро до­химоор. Мүрысөө эмхидхэг­шэд энээниие һайн ойлгодог хадаа хабаадаһан гэр бүлэ бүхэниие дэмжэхын тула зургаан шэглэлээр шангай һууринуудые тогтоогоо, үнэтэй бэлэгүүдые барюу­лаа.