​Дэлхэйн арадуудай онтохонууд - буряадаар

«Буряад үнэн» со­ниндомнай Ба­ярма Дымбрыло­ва-Дамбаринчиновагай буряадшалһан дэлхэйн арадуудай онтохонууд толилогдожо байдаг. Хүн зон тэдэнииень ехэ һонирхожо уншадаг юм. Харин мүнөө тэдэ оршуулгануудыень бүхэли ном болгожо гар­гаха талаар ехэ ажал ябу­улагдажа байна. Тиин һаяхана “Аман зохёолой алтан абдарһаа: дэлхэйн арадуудай үльгэр онтохо­нууд” гэһэн гаршаг доро тэдхэмжэ үзүүлэлгын хэм­жээ ябуулга Улаан-Үдэ хо­тын 49-дэхи һургуулида үнгэргэгдөө.

Хэмжээ ябуулгын эхин­дэ Буряад Уласай Арадай Хуралай һунгамал, тус һургуулиин захирал Люд­мила Попова эгээл удха ша­нартай хэрэг эмхидхэгдэжэ, олон зоной оролдолгоор бэелүүлэгдэжэ байһыень тэмдэглээ. “Буряад ороной дэбисхэр дээрэ ажаһуудаг олон ондоо яһатанай өөһэд хоорондоо эбтэй эетэй ажамидаржа байһыень гэршэлһэн, илангаяа ур­гажа ябаа залуу үетэндэ, үхибүүдтэ эгээл хэрэгтэй, аша туһатай номой хэблэлдэ бэлдэгдэжэ байхадань урма­шахаар. Буряад хэлэн дээрэ оршуулагдаһан үльгэрнүүд саашадаа хэдэн үе дамжан ябаг лэ, айлшадтаа бэлэглэ­дэг заншалтай болохобди”, - гэжэ Людмила Попова хэлээ. Гэхэтэй хамта, өөрын зүгһөө 5000 түхэриг мүнгэ нэмэри болгожо оруулһан байна.

Бэлигтэй сэтгүүлшэн, оршуулагша, театр шэн­жэлэгшэ Баярма Дымбрылова-Дамбаринчиновагай бэелүүлжэ үрдеэгүй ажа­лыень түрэлхидынь ехэтэ дэмжэжэ, дэлхэйн арадуудай онтохонуудые нэгэ согсолбори болгон хэблүүлхэ хэ­рэгтэнь олон зон хабаадал­саа. Аман зохёолой “Тоонто” ансамблиин дуушад, 49-дэхи һургуулиин шабинар су­гларагшадта дуу хүгжэмтэ наада дурадхаа. Баярма До­ржиевнатай суг һураһан үетэн нүхэдэй зүгһөө С. Цыбенова, “Тоонто” ансам­блиин хүтэлбэрилэгшэ Ц. Батурова гэгшэд сэдьхэлэй дулаахан үгэнүүдые дурда­жа, наһанайнь намтартай танилсуулһан байна.

Ородой Холбоото Уласай Гүрэнэй Дүүмын һунгамал Алдар Дамдиновһаа 99000 түхэриг мүнгэнэй тэдхэм­жэ үзүүлэгдээ. Тус хэм­жээ ябуулгын туршада аман зохёолдо дуратай­шуулай болон һургуулиин шабинарай зүгһөө дүн хам­та 25340 түхэриг мүнгэн суглуулагдаһан байха юм.