​Алдар Цыденжаповтал эрэлхэг зүрхэтэй байг лэ

Үнгэрһэн долоон хоногто Россиин Герой Алдар Цыденжаповай мүнхэ дурасхаалда Улаан-Үдэ хотодо бодхоогдоһон хүшөөгэй дэргэдэ хүн зон олоороо сугларба. Ушар юуб гэхэдэ, энэ жэлэй хабарай сэрэгтэ татагдаха хүбүүдтэ зорюулагдаһан олониитын хэмжээ ябуулга эмхидхэгдээ.

Хэмжээ ябуулгада Сибириин федеральна тойрогоор федеральна ахамад хинан шалгагша Сергей Ромахин, Буряад Уласай Арадай Хуралай хорооной түрүүлэгшын орлогшо Виктор Малышенко, Улаан-Үдэ хотын мэрэй орлогшо Алексей Хандархаев, сэрэгэй прокурор, подполковник Антон Миронов, Ородой христиан шажанай санаартан Олег Беломестных, буддын шажанай шэрээтэ Баир лама, Сэрэгшэдэй эхэнүүдэй нэгэдэлэй зүгһөө Ольга Ганичева, Алдар Цыденжаповай эхирэй үрөөһэн эгэшэ Арюна Цыденжапова, сэрэгтэ татаха ба бэлэдхэл гаргаха талаар таһагай дарга Александр Усенко гэгшэд залуу хүбүүдэй сэрэгэй албанда мордоходо амаршалан, баярай үгэнүүдые хэлэбэд.

“Энэ нангин газарай хажууһаа, Геройн хүшөөгэй дэргэһээ, дэмы албанда ошоногүйт. Таанад тон харюусалгатай шата дабахатнай. Ёһотой эрэ хүнэй нэрэдэ хүрэмэ, элүүр энхэнүүд, шанга бэетэйнүүд, һайнаар уялгаяа дүүргэжэ ерэхыетнай хүсэнэб”, - гэжэ Улаан-Үдэ хотын мэрэй орлогшо Алексей Хандархаев хэлээ.

“Мүнөө жэлэй хабарай сэрэгэй албанда 100 хүн ошобо, уласһаа бүхыдөө 1000 хүбүүд ошохо ёһотой. Хүбүүдые бэлдэлгээр нёдондо түрүүлээбди, харин гүрэн дотор 2-дохи һуурида гараа бэлэйбди. Хүбүүд сэрэгэй албанда ошоходоо, жолоошодой, автокрановщигуудай мэргэжэлдэ һурана”,- гэжэ Александр Усенко тэмдэглэнэ һэн.

Эхирэй үрөөһэн Арюна эгэшэнь иигэжэ хэлээ: “2010 оной сентябриин 24-дэ Номгон далайн флодой “Быстрый” эсминец дээрэ 9 секундын туршада Алдар сугтаа алба хэжэ байһан 300 хүбүүдэйнгээ ами наһа абараа юм. Сэрэгэй алба һайнаар дабажа гараад ерэхыетнай хүсэнэб, элүүр энхэ, шадал тэнхээтэй бусахатнай болтогой. Манай Алдарые мартангүй, һанажа ябаарайт”.

Һүүлэй үедэ сэрэгэй албанда ошогшод нэгэ жэлэй туршада алба дүүргэдэг уялгатай болонхой. Гадна эдеэ хоол һайн, сэрэгшэд ажахын хүдэлмэри хэхэеэ болинхой, эдеэнэй газарай ажалһаа сүлөөлэгдэһэн, гансал албаяа хээд байдаг юм. Тиихэдээ сэрэгшэд эмхитэй, журам һайтай болоно, мүн тэдэнэй урда сэрэгэй талаар шанга эрилтэ табигдана гээшэ.

Хүбүүд һайн хүмүүжэл гаража, хүндэ хүшэрые тэсэжэ, нүхэсэжэ һурана, оюун сэдьхэлэй талаар һайн ургалта абажа ерэхэ жэшээтэй.

Росси гүрэнөө, Буряад Уласаа үргэжэ ябаха тухайнь нэгэнтэ бэшэ эндэ хэлэгдэбэ.

“Буряад Уласай хүбүүдтэй суг тагнуулда ошохоор байдаг”, - гэжэ олон зоной хэлсэдэгые нэгэтэ бэшэ дуулаһанаа Ольга Ганичевашье нэмэжэ хэлэнэ һэн.

Авторай гэрэл зураг