​Эршэмтэй ажалай эхин табигдаа

Вячеслав Кравченко, Сергей Козлов болон Алексей Лизунов 2-дохи ТЭЦ барилгын ба шэнэлэлгын арга боломжонууд тухай хэлсэнэд

Зайн галай элшэ хүсөөр дулаа дамжуулдаг оньһон хэрэгсэл һэльбэн шэнэлхэ арга боломжо­нуудые сэгнэхэ зорилготойгоор Оро­дой Холбоото Уласай энергетикын сайдай орлогшо Вячеслав Кравчен­ко Буряадта морилон ерэбэ.

Улаан-Үдын 2-дохи ТЭЦ шэнэлжэ, хүсыень улам дээшэлүүлхын тула 33 миллиард түхэриг хэрэгтэй юм. Хэр­бэеэ 27 миллиард түхэригынь барилга дүүргэлгэдэ шэглүүлэгдэхэ һаа, үлээшэ 6 миллиард түхэриг мүнгэн дулаа үгэ­лгын ба зайн галай һужаа шэнэлэлгэдэ шэглүүлэгдэхэ. Мүнөө дээрээ энэ ехэ барилгын түрүүшын шатада тусхай оньһото түхеэрэлгэнүүд тохогдоо. Ти­игэжэ хэдэн байшанууд үйлэдбэриин талмай дээрэ бодхоогдоо.

“Улаан-Үдэ хотодо генерациин бай­дал шиидхэхэ талаар бэрхэшээлтэй асуудал уласай Толгойлогшо Алексей Цыденов нэгэнтэ бэшэ табиһан бай­на. Мүнөөдэрэй эндэхи байдал бодото дээрэнь хаража, шүүмжэлэн сэгнэхэ хүсэлтэйбди. Тус комплексын саашан­хи хүгжэлтэ тодоруулан, дулаагаар болоод зайн галаар хангалгые бүхы тээһээнь шэнжэлжэ үзөөд, тааруу шиидхэбэри абаха ёһотойбди”, - гээд, Вяче­слав Кравченко уулзалгын үедэ тэмдэ­глэһэн байха юм.

Нёдондо Ородой Холбоото Уласай Засагай газарта, тиихэдэ федеральна хэмжээнэй хуралдаан дээрэ энэ барил­га түгэсхэхэ тухай зүбшэн хэлсэгдэһэн байгаа.

“Энэ түсэл бэелүүлгын талаар хүсэд шиидхэгдээгүй асуудалнууд олон. Эгэ­эл шухалань гэхэдэ, мүнгэ гаргашалга болоод, тэрэнээ тэхэрюулэн бусаалга мүн. Гүрэнэй Засагай газарай талаһаа ТЭЦ шэнэлэлгэдэ онсо анхарал хандуу­лагдажа, мүнөөдэрэй байдалаар ажал эршэмтэйгээр ябуулагдажа эхилхэнь. Буряад Уласай Засагай газартай, то­дорхойлбол, Алексей Цыденовтэй энэ ажал хамта ябуулнабди. Ударидажа байһан ажалаймнай үрэ дүн бүгэдэ зондо таарама байха, Буряадайм­най саашанхи хүгжэлтэдэ һайн нүлөө үзүүлхэ гэжэ найданаб”, - гэжэ “ТКГ-14” компаниин генеральна захирал Алек­сей Лизунов хэлэһэн байна.

Иван Подберёзкиной гэрэл зураг

«Буряад үнэн» мэдээсэлэй албан