​Түүхэтэ хүүргэ

Хоёр далайн хоорондохи Керченскэ уулзуур дээгүүр баригдаһан Крымэй хүүргэ ашаглалда тушаагдаха ёһолол майн 15-да Ородой Холбоото Уласай Юрэн­хылэгшэ Владимир Путинай хабаадалгатайгаар үнгэрбэ.

Авто-унаагай гараха дүрбэн зуруудтай байхаһаа га­дуур, түмэр харгын зурууд­тай 19 модо утатай хүүргэ хоёр жэлэй туршада бариг­даа. Гүрэн дотор эгээл томо барилгануудай нэгэн болохо энэ хүүргэ болзорһоо хахад жэл урид ашаглалгада тушаагдаба.

Крымэй хүүргэ хадаа Крымэй Керченскэ бага ол­тирогые Краснодарай хиза­арай Таманска бага олтирог­той холбоно. Хэрбэеэ майн 16-һаа хүнгэн унаанууд болон автобусууд хүүргэ дээгүүр уһа гаталжа эхилээ һаань, октябриин 1-һээ ашаа зөөдэг томо машинанууд ябаха эр­хэтэй болохо юм. Үдэрэй туршада хүүргэ дээгүүр 40 мянган хүнгэн унаа гараха аргатай.

Харин түмэр харгынь 2019 оной декабрь һарада ашаглалгада тушаагдаха.

- Энэ түүхэтэ үдэр. Үшөө хаанта засагай үедэ энэ хүүргэ бариха түсэб байгаа. Үнгэрһэн зуун жэлэй гушаад, дүшөөд, табяадшье онуудта хүүргэ бариха тухай хэлсэг­дээ. Мүнөө танай бэлиг та­лаан, ажал, эдэбхи үүсхэлэй ашаар ехэ хэрэг бүтэбэ! – гэжэ Владимир Путин хүүргэ барилгада хабаадаһан бүхы мэргэжэлтэдтэ баяраа мэдүүлбэ.

Удаань гүрэнэй хүтэлбэрилэгшэ КамАЗ машина жолоодожо, барилгын үедэ хэрэглэгдэһэн техникэ уда­ридан, хүүргэ дээгүүр гара­ба.

Арба мянгаһаа дээшэ хүн энэ барилгада хабаадаа. Ажалай эршэтэй­гээр ябуулагдаһан сагта 15 мянгаһаа үлүүтэй хүн эндэ хүдэлөө. Тиихэдэ 220 үйлэдбэри барилгын элдэб түхэлэй ажалнуудые хэһэн байна.

Энээнһээ урид Украинаһаа Крым хүрэдэг байгаа һааб даа. Теэд Крым Уласай Ород гүрэнэй бүридэлдэ ороһон сагһаа хойшо тиишээ хүрэхэ харгы үгы болоһон байна. Хүүргэ барилгада ехэнхидээ политическэ бай­дал нүлөөлөө гэжэ Эдэй за­сагай ехэ һургуулиин транс­портын институдай захирал Михаил Блинкин тэмдэглээ.

Хүүргын 74 түсэл хара­жа, мэргэжэлтэ шүүбэришэд мүнөө хэгдэһэн хүүргэ шэлэһэн байна. 2016 оной февраль һарада Крымэй хүүргын түсэл гүрэнэй зүбшэл абажа, барилга эхи­лээ.

Хүүргэ барилгада 227,9 миллиард түхэриг гаргаша­лагдаа. Хизаарламал харюу­салгатай «Стройгазмонтаж» гэжэ барилгын бүлгэмтэй 222,4 миллиард түхэригэй хэлсээн баталагдаа.

Барилгын-хабсаралгын шухала ажалнууд 2016 ондо эхилһэн байна. Сагай ула­рил, газарай хүдэлсэ гэхэ мэтэ байгаалиин шэнжэнүүд барилгын үедэ һаад ушаруулаа. Тиибэшье ажал ехэ на­ринаар хэгдэһэн байна.

Крымэй хүүргын баригдаһанай удаа аяншалагшадай тоо улам дээшэлхэ гэжэ Кры­мэй засаг зургаан хүлеэнэ. Үнгэрһэн жэлдэ Крым Улас 5,39 сая аяншалагшад ошоһон байха юм.

Тиигэбэшье үшөө олон асуудалнуудые шиидхэхээр. Крымэй хүүргэ хүрэһэн хар­гынуудай байдал, тэрэ тоодо «Таврида» гэһэн федеральна харгы бариха хэрэгтэй. Энэ харгы Керчь хото Симферо­поль болон Севастопольтой холбохо. Тэрэнэй барилга­да 163 миллиард түхэриг хэрэгтэй. Харгы барилгын эхин шатые 2018 оной һүүл багта дүүргэхэ түсэб бии. Тиихэдэ Краснодарай хи­заарай харгынууд баһал заһабарилагдахаар болон­хой.