​Эхи һайтай ажал бүтэсэтэй

Ородой Холбоото Уласай Буддын шажанай заншалта Сангхын, Агын дасанай санаартанай болон Буряад Уласай Засагай газарай дэмжэлтээр байгуулагдаһан бүгэдэ Буряадай эмхидхэлэй хороо­ной аша оролдолгоор “Алханын найман субарга” барилгада, мүн Далай ламын субарга һэльбэн шэнэлэлгэдэ зорюулһан хэмжээ ябуулга майн 19-дэ Улаан-Үдэ хотодо үнгэргэгдэбэ.

Нигүүлэсхы сэдьхэлэй мара­фон - нааданда олон тоото зон ха­баадаа: санаартан, Засагай газа­рай түлөөлэгшэд, мэдээжэ дуушад, үхибүүд, Буряадай ажаһуугшад.

Эдэ субаргануудые барилга ха­даа һүүлэй үедэ һүжэрэн дэлгэрһэн галай аюулай болон ган гасуурай тодхорһоо зайсуулхын тула хүн зо­ной боди сэдьхэл һэргээхэ талаар буддын шажанай хүгжэлтэдэ холын хараатай, удха шанартай хэмжээ ябуулга эмхидхэгдэбэ гэжэ тэмдэ­глэхэ шухала.

Буянта хэрэг дэмжэһэн, эмхид­хэгдэжэ байһан ажаябуулгада гүн сэдьхэлһээ хубитаяа оруулалсаха эрмэлзэлтэй буряад угсаатан олоороо суглараа. Ага нютагһаа бүлэг зон ерэжэ, энэ хэмжээ ябуулгада хабаадалсаһан байна. Агын даса­най шэрээтэ Бадма Цыбиков сугла­рагшадта хандахадаа, 1991 ондо үндэр түрэлтэ Далай ламын Ага нютаг морилһон тухай тобшохоноор хөөрэжэ үгөө. Тиигэжэ Далай ламада зорюулагдаһан субарга са­гай эрхээр һэльбэн шэнэлэгдэхээр болоһон тухайнь ба шэнээр Алхана уулынгаа бооридо найман субарга барилга тухай хэлэхэдээ, бүхы бу­ряад араднай һаналаараа нэгэдэжэ, хамтын хүсөөр бүтээһэн хэрэг хэ­зээдэшье хүсэтэй, шадалтай байдаг гээд тэмдэглээ. “Энэ ажаябуулгадам­най эхи үндэһэ табилсаһан, Далай ламын адиста хүртэжэ ерэһэн Улаан-Үдын Железнодорожно поликлини­кын таһагые даагша, Мухар-Шэбэр нютагай Дынсыма Дышеновагай үүргэ нүлөө нилээд ехэ,” - гэжэ Бадма ламхай онсолон тэмдэглэһэн байна. Буряад Уласта ажаһуудаг Агын эблэ­лэйхидэй зүгһөө Баясхалан Раднагу­руев, Агын Буряадай тойрогой захир­гаанай түлөөлэгшэ Солбон Цыренов, Ивалгын дасанай шэрээтэ Аюр лам­хай, Буряад Уласай аймагуудай засаг зургаанай түлөөлэгшэд тайзан дээрэ уригдажа, хэн хэниинь энэ дэмбэрэл­тэй хэрэгтэ нэмэриеэ оруулалсахаар бэлэн байһанаа мэдүүлээ.

Тиихэдэ Агын Буряадай тойро­гой захиргаан ба “Дулдаргын аймаг” гэһэн нютагай засагай байгууламжа нэгэ-нэгэ субаргын барилга өөрын ээм мүр дээрэ даажа абанабди гэжэ олониитэдэ мэдүүлээ.

Буряад Уласаймнай урдаа хараха дуушад Бүтидэй Дондог, Дулма Сунрапова, Зоригто ба Нонна Тогочиев­тан Аюша хүбүүнтэеэ, Лудуб Очиров, Валико Гаспарян, “Байгал” театрай хатаршад, Агын “Амар сайн” театрай­хид, оперо болон баледэй театрай артистнар, хотын хүүгэдэй хатарша бүлэгүүд хүгжэм дуута наада дэлгээ.

Нааданай үедэ залган уншаг­шын соносхоһоор 305 500 түхэриг мүнгэн хандиб оруулагдаа. Гэхэтэй хамта, нааданай туршада хубита­яа оруулһан зоной нэрэ обогууд саг үргэлжэ дурдагдажа байгаа. Наймаалагдаһан биледүүдэй ара та­ладань хүн зон нэрэ обогуудаа бэ­шээд, түхеэрэгдэһэн тусхай хайрсаг соо тэрэнь хэгдэжэ, субаргын бумба нюулганда хэрэглэгдэхэ юм гээд хэ­лэгдээ. Зэргэ үшөө нэгэ хайрсаг соо үргэлэй мүнгэ оруулха арга мүн лэ олгогдоһон байна.

Шэнэхээнэй буряадууд 239 100 түхэриг мүнгэн туһаламжа үзүүлээ. Ярууна, Хэжэнгэ аймагууд 120 000, Загарай, Мухар-Шэбэр, Бэшүүр айма­гууд - 50 000, Захаамин, Аха, Түнхэн аймагууд - 200 000, Баргажан, Хурам­хаан, Баунтын аймагууд - 150 000, Зэдэ, Сэлэнгэ, Хяагта, Ивалга айма­гууд – 150000, тиихэдэ Усть-Ордын Буряадай тойрогой ажаһуугшадһаа 600 000 түхэриг мүнгэн оруулагда­хаар хараалагдана. Буряад Уласай Болбосоролой болон эрдэм ухаа­най яаманай сайд Баир Жалсанов өөрын гэр бүлын үмэнэһөө 10 000, Зүдхэлиһөө тоонтотой Баясхалан Дармаевай бүлэ 12 000 түхэриг мүнгэнэй хандиб үргөө. Үшөөшье олон айл бүлэнүүдэй нэрэнүүд соносхогдоһон байна.

Агын дасанай бухгалтеридэ мүнгэн туһаламжын тусхай тоосоон нээгдэнхэй. Олоной хүсөөр энэ ажал урагшатай бэелүүлэгдэхэ, бүгэдэ буряадуудай аша оролдолгоор энэ буянта хэрэг номой ёһоор бүтэхэнь болтогой!