852
Майн 27-ной үдэшэ Түнхэн аймагай дархан газарта түймэрэй гараһан тухай мэдээсэл орожо, тэрэл үдэртөө 2 гектарһаа бага талмайда түймэр сарагдаа. Ажаһуугшадай галда хайша хэрэгээр хандаһанһаа боложо, түймэр гараа гэжэ тэмдэглэлтэй. Ойн харуулай 5 хүдэлмэрилэгшэд түймэр саралгада хабаадаа. Амаралтын үдэрнүүдтэ Сэлэнгэ болон Муя аймагуудта түймэр сарагдаа.
Майн 28-най 0.00 сагай мэдээсэлээр, Сэлэнгэ аймагта 7,5 гектар талмайда түймэр сарагдана.
Тиихэдэ замбуулинһаа шалгалта хэдэг «ИСДМ-Рослесхоз» гэһэн программын мэдээсэлээр, Бабанта аймагта гараһан түймэр хинагдана. Энэ түймэр һууринууд болон эдэй засагай обьектнүүдтэ хохидол үзүүлхээр бэшэ. Тэрэниие унтараалгада хохидол үзүүлһэнһээ ехэ гаргаша байха гэжэ тоологдожо, онсо байдал усадхаха болон һэргылхэ комисси түймэр унтараахаяа болихо тухай шиидхэбэри абаһан байна.
Буряад уласта түймэрэй аюултай хаһын эхилһэнһээ хойшо10,4 мянган гектар талмайда 178 түмэр гараа гэжэ бүридхэлдэ абтанхай. Үнгэрһэн жэлэй энэл сагай мэдээсэлээр, 115, 8 мянган гектар талмайда 233 ойн түймэр гараһан байна.
Буряад Уласай дэбихэртэ түймэрэй аюултай хаһын онсо гурим соносхогдонхой. Хүн зоной олоор ябадаг газарһаа бэшэ тээ, ойдо орохо, түүдэг носоохо, хагда, бог шорой галдаха хоригдоно. Эдэ дүримүүдтэ хайша хэрэгээр хандабал, эрхэтэд - 4 мянганһаа 5 мянган хүрэтэр; харюусалгата нюурнууд – 25 мянганһаа 45 мянган хүрэтэр, юридическа нюурнууд 300 мянганһаа 500 мянган хүрэтэр ялада тохогдохо юм.
Түймэрэй гараһан тухай дүтын ойн ажахыда гү, али (83012) 20-44-44 гэһэн утаһаар дуулгыт гэжэ ойн харуулшад ажаһуугшадта хандана.
