896
«2013-2020 онуудта хүдөө ажахы хүгжөөхэ, үйлэдбэрилһэн эдеэ хоол, түүхэй эд, эд бараагай дэлгүүрнүүдые гуримшуулга» гэһэн гүрэнэй программын «Хүдөө нютагуудай дэбисхэрэй тогтууритай хүгжэлтэ» гэһэн программын хэмжээндэ хүдөө нютагта ажаһуудаг бүлэнүүдтэ үнэмшэлгэ барюулагдаба. Буряад Уласай Засагай газарай Түрүүлэгшын хүдөө ажахы хүгжөөлгын талаар орлогшо – Буряад Уласай хүдөө ажахын болон эдеэ хоолой сайд Даба-Жалсан Чирипов хүдөө нютагта ажаһуугшадта гэр бариха, худалдан абаха үнэмшэлгэнүүдые барюулаа.
Агроном, багша, фельдшер болон фермернүүд – дүн хамта 11 хүн гэр байратай болобо. Байгша ондо гэр байратай болгохо талаар 9 сая түхэриг һомологдохо юм. Буряад Уласай, федеральна болон нютагай засагай байгууламжануудай бюджедүүдһээ мүнгэн һомологдохо.
- Бидэ мүнөө гэр бариха үнэмшэлгэтэй болоһондоо ехэ баяртайбди. Буряадай гүрэнэй хүдөө ажахын академи дүүргэһэнэй удаа нүхэртэеэ хүдөө нютаг ерэжэ, залуу мэргэжэлтэдые дэмжэһэн хүдөө ажахын болон эдеэ хоолой яаманай программаар 250-250 мянганай тэдхэмжэдэ хүртөөбди, - гэжэ, «Гарантия 2» бүлгэмэй ахамад агроном Михаил Пешков хэлэбэ.
Хүдөө нютагуудта ажаһууха болбосон түхэлтэй оршон байдал байгуулха талаар зорилгонууд түрүүлэн бэелүүлэгдэнэ гэжэ Даба-Жалсан Чирипов тэмдэглэбэ.
- Һүүлэй табан жэлэй туршада гэр байрын байдал һайжаруулха талаар 362 эрхэтэд гүрэнэй тэдхэмжэдэ хүртэһэн байна. Энэ программар бүхыдөө 152,4 сая түхэриг һомологдоо, федеральна бюджетһээ – 94,5 сая түхэриг, уласай бюджетһээ - 57,9 мая түхэриг, - гэжэ хүдөө ажахын болон эдеэ хоолой сайд Даба-Жалсан Чирипов хэлэбэ.
2014 онһоо хойшо «2013 он болотор хүдөө нютагуудай ниигэмэй хүгжэлтэ» гэһэн программа һэлгэн, «Хүдөө нютагуудай дэбисхэрэй тогтууритай хүгжэлтэ» гэһэн программа бэелүүлэгдэжэ эхилээ. Тиихэдэ хүдөө нютагуудта ажаһуудаг залуу бүлэнүүд болон мэргэжэлтэдэй гэр байрын байдал һайжаруулха талаар программа бэелүүлэгдэдэг.
