​Ойн түймэр унтараалгада наһа бараһан Валерий Жанцановта гүрэнэй шагнал олгохо тухай Буряадай Толгойлогшо даалгабари үгэбэ

Буряад Уласай Толгойлогшо Алексей Цыденов үсэгэлдэр үнгэргэгдэһэн түсэблэлгын суглаанда Валерий Жанцановта гүрэнэй шагнал олгохо тухай хэлэбэ.

Буряад Уласай ойн ажахын агентство эрэлхэг баатаршалга гаргаһан Валерий Жанцановта гүрэнэй шагнал олгохо талаар дансануудые бэлдэхэ юм.

- Удаан татангүй, дансануудые бэлдэгты, - гэжэ уласай хүтэлбэрилэгшэ ойн ажахын агентствын хүтэлбэрилэгшэддэ хэлэбэ.

Байгша оной майн 18-да Хурамхаан аймагта тамхи татажа, тэрэнээ хүсэд унтараангүй хаяһанай удаа ойн түймэр гараһан байна. Һалхитай уларил тогтожо, түймэр тэрэ дары таража, Хурамхаан аймагта түймэрэй аюултай хаһын онсо байдал соносхогдоо. Хоёр мянган гектар талмайда һүжэрһэн түймэр майн 21-дэ унтараагдаа. Түймэр саралгада Буряад Уласай бүхы аймагуудай 230-һаа дээшэ ойн харуулшад, түймэр сарагшад хабаадалсаа.

Түймэр сарагшадай бүлэгһөө үлэшэһэн нүхэрөө, Аюр Цыренжаповые, абарха гэжэ ябаһаар, Валерий Жанцанов наһа бараһан байна. Түймэр сарагшад гал дүлэн сооһоо гаража шадаагүй.

Буряад Уласай хүтэлбэрилэгшэ наһа бараһан түймэр сарагшадай гэр бүлэтэйнь уулзажа, туһа хүргэхэ тухайгаа мэдүүлээ. Алексей Цыденовэй даалгабаряар Буряад Уласай Засагай газарай нөөсын жасаһаа наһа бараһан Валерий Жанцановай болон Аюр Цырежаповай гэр бүлэнүүдтэ нэгэ сая түхэриг дамжуулагдаа. Тиихэдэ һаяын үдэрнүүдтэ ойн ажахын федеральна эмхиһээ мүнгэн туһаламжа үзүүлэгдэхэ. Аюр Цыренжаповай үхибүүдтэ тэжээгшэеэ алдаһан ушараар, пенси түлэгдэхэ.

Хяагта аймагай Мурочи һууринай Валерий Жанцанов 1962 ондо түрэһэн юм. Ойн ажахыда тэрэ хоринһоо дээшэ жэлдэ ажаллаһан байна.