​Буряад Уласта “Меркурий” гэһэн гүрэнэй түсэл бэелүүлэгдэжэ эхилхэнь

Юлия Шпиц Эрдэм Сангадиев хоёр

Ямараар, юугээр хэгдэһэн эдеэ хоол эдинэбибди гэһэн асуудал манай ажаһуугшад нэгэтэ бэшэ табиһан байха. Байгша оной июлиин 1-һээ хой­шо бүхы зүйлнүүдые хаанаһаа “уг гарбалтайб” гэжэ мэдэдэг болохомнай. Юуб гэхэдэ, “Меркурий” гэһэн гүрэнэй түсэл бэелүүлэгдэжэ эхилхэнь. Ушар иимэһээ ве­теринарна албан тусхай электронно данса бэшэжэ үгэдэг болохоор хараалагдана.

Буряад Уласай ветеринар­на хорооной хүтэлбэрилэгшэ Эрдэм Сангадиевай хэлэһээр, ветеринарнууд шэнэ байдал­да хүдэлхөөр бэлэн.

- Нэн түрүүн эдеэ хоолдо электронно данса тусхай 90 газарта үгэхэ гэжэ хэлэгдээ. Буряад Уласай Толгойлогшо Алексей Самбуевич Цыде­новэй гуйлтаар энэ тоо 119 болгогдоо, - гэжэ Эрдэм Сан­гадиев хэлэнэ.

Электронно тусхай дан­са абахын тула ветеринарна албанда хандаха хэрэгтэй. Томо ажахынууд “Мерку­рий” гэжэ системэдэ заал һаа оруулагдаха ёһотой. Эндэ тоологдоогүй һаа, тэдэ эдеэ хоолойнгоо зүйл наймаан­да гаргажа шадахагүй. Эр­дэм Сангадиевай хэлэһээр, бүридэлдэ 6000 гаран ажахы оруулагдаха юм. Мүнөө үедэ энэ бүридхэл хэгдэжэ байн­хай. Һүүлэй мэдээгээр, “Мер­курий” соо 4,5 мянга гаран ажахы тоологдоно.

- Электронно тусхай дан­са соо хэдэн мэдээсэл оруу­лагдаха. Ямар зүйл бэ, юугээр хэгдээб, хэн үйлэдбэрилөөб гэхэ мэтэ мэдээнүүд байха юм. Гэхэтэй хамта, үхэр ма­лаа амидыгаар худалдаха гэбэл, тэрэ дансада хэзээ тусхай вакцинаар тарилга хэгдээб гэһэн мэдээсэл бай­ха. Наймаа хэгшэд “Мерку­рий” орожо, ямар эдеэ хоол худалдахаяа байһанаа ойл­гохо. Һаял электронно данса үгтөөд байхадань, тэдэ эдеэ хоол хэһэн ажахытай, хүн зонтой сэхэ харилсаха арга­тай. Мүн харгыда ДПС байл­гаад, эдеэ хоолой зүйл шал­гаха гээ һаа, баһа “Меркурий” ороод, бүхы мэдээсэл хара­жархиха, - гэжэ ветеринариин албанай хүтэлбэрилэгшэ тайлбарилаа.

Энэ хэрэг ажаһуугшадта ехэ туһа боложо үгэхэ. Юуб гэхэдэ, һүүлэй үедэ муу ша­нартай элдэб янзын эдеэ хоол барижа, олон хүн наһантаяа хахасана, элдэб үбшэнтэй дайралдана. Хүн бүхэн магазинһаа гү, али ногоон дэлгүүрһээ шанар һайтай эдеэ хоол абаха гэ­бэл, зүйл дээрэ табигдан­хай штрих кодто гарайнгаа утаһа дүтэлүүлээд, бүхы мэ­дээсэл абахаар.

“Меркурий” хадаа Буряадта яһала үрэ дүнтэйгөөр нэбтэрүүлэгдэхээр хараа­лагдана. Тарбагатай аймагай ветеринарна албанда мяха шүлэ, сагаан эдеэ шалгаха лабораториин хэрэгсэлнүүд хүсэд юм. Энээн тухай тус албанай шүүмжэлэгшэ Юлия Шпиц мэдүүлнэ. Тэ­рэнэй мэдээсэһээр, тусхай бүридэлдэ табилга, мүн электронно данса абалга тиимэшье ехэ саг эзэлнэгүй, 10-15 минута соо данса бэ­лэн болоно.

Буряад Уласай Засагай газарай Түрүүлэгшын ор­логшо, хүдөө ажахын болон эдеэ хоолой яаманай сайд Даба-Жалсан Чириповэй тэмдэглэһээр, “Меркурий” түсэлэй ашаар хүн зонойн­гоо бэеын элүүрые хамгаал­набди.

Авторай гэрэл зураг