​Буряад Уласай байгуулагдаһаар 95 жэлэй ойн баяр

Мүнөөдэр, майн 30-да Буряад Уласаймнай байгуулагдаһаар 95 жэл гүйсэбэ. Энэ алдарта ойдо зорюулагдаһан Бүхэроссиин эрдэмэй практическэ хуралдаан Буряад Уласай ниислэл хото Улаан-Үдэдэ үнгэргэгдэнэ. Бүхыдөө энэ хуралдаануудта 130 эрдэмтэд хабаадана.

Үглөөнэй 10 сагта Буряад Уласай Засагай газарай ехэ танхимда пленарна суглаан эхилээ. Амаршалгын үгэнүүдые Буряад Уласай Засагай Түрүүлэгшын орлогшо Баир Цыренов хэлэхэдээ, Буряадаймнай бүхы аймагуудта баярай суглаанууд мүнөө үнгэржэ байна гэжэ тэмдэглэбэ. Тиихэдэ 100 жэлэйнгээ ойе угтаха бэлэдхэл эхилээ. Энээн тухай Владимир Путин тусхай зарлигта гараа табиһан байна.

АрадайХуралай түрүүлэгшэ Цырен-Даша Доржиев Буряад-Монгол АССР-эй байгуулагдаһанай түүхэтэ удха шанар тухай, 160 яһатанай эб хамта ажаһуудагые мэдүүлээ. Улаан-Үдын мэрэй орлогшо Александр Иринчеев Буряад Уласай хүгжэлтэдэ ниислэл хотын шиидхэхы үүргэ онсолоо. Уласай Толгойлогшын дэргэдэхи Ахамадуудай зүблэлэй түрүүлэгшын орлогшо Вячеслав Подлеснов алдарта ойгоор бултаниие амаршалхадаа, Эсэгэ ороноо хамгаалгын дайнда Буряад Уласай оруулһан хубитые үндэрөөр сэгнэбэ. Тэрэ һүрөөтэ жэлнүүдтэ Буряадһаамнай 120 мянган сэрэгшэд дайнда хабаадажа, 40 мянганиинь баатарай үхэлөөр унаа. 6500 хүн эрэмдэг боложо бусаа. 43 баатарнууд Советскэ Союзай Геройнууд болоо. 11 хүн Алдар Солын орденой дүүрэн кавалернүүд болоһон байна.

Буряадай эрдэмэй түбэй залуу эрдэмтэдэй зүблэлэй түрүүлэгшэ Евгений Нолев энэ жэл үшөө нэгэ тэбхэр ой – комсомолой 100 жэл угтаха байһанаа һануулаа. Бултаниие Гүрэнэй Дүүмын һунгамал Алдар Дамдинов халуунаар амаршалаа. Академик Борис Базаров Буряад-Монголой АССР-эй байгуулагдахаһаа эхилжэ, мүнөө үе хүрэтэрхи түүхэтэ зам тухай элидхээ. Профессор Ёндон Гармаев Буряад уласай экологиин талаар хүшэр байдалые элирхээлээ. Профессор Зоригто Дондоков Буряад Уласай хүгжэлтын шатануудые урданһаа шэнжэлжэ, саашанхи хүгжэлтын замые хараалаа. Академик Арнольд Тулохонов гүрэн түрын байгуулгада эрдэмэй удха шанарые онсолон тэмдэглээ.

Үдэрэй 14 сагһаа Буряадай эрдэмэй түбтэ 7 секцинүүдээр хуралдаанууд үнгэрнэ.

Үдэшын 18 сагта оперо болон баледэй театр соо Буряад Уласай һайндэртэ зорюулагдаһан олониитын баярай суглаан үнгэргэгдэхэ.