​“Һургуули” гараһан зониие һунгая

Байгша оной сентябриин 9-дэ һунгалта үнгэржэ, Буряад Уласай Арадай Хуралай 6-дахи зарлал бүридүүлэгдэхэ гээд мэдэнэбди. Эгээл тиимэһээ “Ниитэ нэгэн Росси” гэһэн намай эрхилдэг уридшалһан шэлэлгэ - праймериз июниин 3-да үнгэрнэ. Тэрээндэ илагшад тус намай дэмжэлтэдэ хүртэхэ юм. Тиигэхын тулада мүнөө дээрээ ехэ тулалдаан боложо байна гэхэдэ болоно. Юундэб гэхэдэ, аяар 240-өөд хүн 33 тойрогһоо праймеризда хабаадана бшуу.

Эгээл ехэ тулалдаан Түнхэн болон Аха аймагые хараалһан 1-дэхи тойрогто болоно. Юундэб гэхэдэ, тэндэ аяар 10 хүн хабаадана. Тиихэ­дэ Хори, Хэжэнгэ болон Зага­рай аймагуудые хараалһан 28-дахи тойрогто хоёрхон лэ хүн оролсоно. Тиибэшье тойрог бүхэндэ 5-8 хүн тоологдоно.

Хэрбэеэ “Ниитэ нэгэн Рос­си” намые мүнөө Арадай Ху­ралда 46 хүн түлөөлдэг һаань, тэдэнэй 42-ынь лэ прайме­ризда хабаадажа байнхай. Арадай Хуралай һунгамал, “Росгосстрах” компаниин Буряадай таһагай захирал Бата Семёнов һунгалтада хабаадаха хүсэлгүй байһанаа мэдүүлээ.

- 1994 ондо байгуулагдаһан Буряад Уласай Арадай Хура­лай 1-дэхи зарлалһаа эхи­лээд, үргэлжэ һунгамалаар ябааб. Гурбадахи зарлалда Москвада Гүрэнэй Дүүмэдэ хүдэлөөб. Хэгдэһэн юумэн бии. Тиимэһээ залуу халаанда харгы нээхэ саг тулажа ерээ. Шэнэ халаан шэлэгдээд, дүршэлтэй болог, арад зон­доо аша туһатай ажал ябуу­лаг, - гэжэ Бата Цырендондо­кович тэмдэглэбэ. - Үнөөхил хүнүүд байгаал һаамнай, баһал буруу шэнги. Нүгөө талаар хараад үзэхэдэ, гэнтэ хуу һэлгэжэрхихэдэ, гэнэтэй ха. Арадай Хуралай ээлжээтэ зарлалда һунгагдаһан депу­тадууд урдань ажалай, ажа­мидаралай һургуули гараһан байха ёһотой. Ажахын гү, али нэгэ байгуулгын дарга байжа, бэе дээрээ харюусал­га даажа үзэһэн лэ хүнүүд Зүблэлтэ засагай үедэ дэ­эшээ дэбжүүлэгдэдэг һааб даа. Мүнөөшье тиимэ эрил­тэ табигдаха ёһотой. Мүнөө ажалаа ябуулжа байһан Ара­дай Хуралай зарлалда ехэ бэрхэ залуу хүбүүд ерээ бэ­лэй. Хэд бэ гэхэдэ, Баир Цы­ренов, Виктор Малышенко... Өөрын һанамжатай, тэрэ­нээ заатагүй хэлэжэ шадаха зүрхэтэй хүнүүдые арад зон һунгаһай гээд найданаб!

Гадна һунгамал бүхэн заатагүй хоёр зарлалай туршада ажалаа ябуулха ёһотой, тиигээл һаа, үрэ дүнгүүдынь элиржэ гараха гээд, Буряад Уласай Арадай Хуралай һунгамал, мэдээ­жэ хирург Галан Дамбиевич Гунзынов тэмдэглэнэ. Тэрэ өөрөө Улаан-Үдын 23-дахи тойрогһоо һунгалтада хабаадажа байнхай. Мэдээжэ эмшэнэй һанамжаар, юрэл бэеэ харуулхаяа бэшэ, харин аша туһатай байхаяа Арадай Хурал руу тэгүүлхэ ёһотой. Һунгалтын дүнгүүдые һайжаруулхын тулада прай­мериз хэгдэнэ. Гансата хуу һайнаар бүтэшэдэггүй. Прай­мериз эмхидхэгдэхэдээ, ду­туу дунданууд байна. Ябан ошон, мууниинь мултаржа, һайниинь үлэхэ аабза. Майн 13-һаа 27 болотор дебаду­уд үнгэрөө. Тэрэнэй үедэ арад зонтой сэхэ харилсаха арга боломжо үгтэнэ. Тии­хэдээ һунгалтада хабаада­жа байһан бусад зонтойшье харилсанабди. Энэ ехэ һайн гэжэ һанагдана.