759
Суглаанда музейн ажаябуулгын шухала һалбаринуудаар хэлсэбэ. Амитадай байрануудые шэнэлхэ, худаг малтаха, зайн галай һужаа болон бахана шэнэлхэ, ашаанай машина худалдажа абаха түсэб болон бусад асуудалнуудаар яамануудай түлөөлэгшэд зүбшэбэ. Тиихэдэ музей хүгжөөхэ түсэлдэ машинануудые табиха газар болон ипподромһоо музей хүрэтэр ябаган харгы барилга оруулагданхай.
Музейн хүдэлмэрилэгшэд Буряад Уласай Толгойлогшо болон яамануудай хүтэлбэрилэгшэдтэ асуудалнуудые табижа, музей хүгжөөхэ талаар дурадхалнуудые оруулаа. Тиихэдэ Алексей Цыденов энэ асуудал шиидхэхэ талаар өөрынгөө һанамжа хэлэбэ. Ондоо хотонуудай жэшээгээр олзын хэрэг эрхилэгшэдые музей дэмжэлгэдэ хабаадуулха гэжэ уласай хүтэлбэрилэгшэ дурадхаба.
«Музей хүгжөөхэ талаар олон дурадхалнууд мүнөө оробо. Харин энэ хэрэгтэ олзын хэрэг эрхилэгшэдые хабаадуулха тухай дурадханаб. Москва хотодо, жэшээнь, амитан бүхэниие эбээн тэдхэгшэ тэжээдэг. Манайшье эндэ хүнүүд эдэбхитэй хабаадаха гэжэ найданаб. Жэшээнь, «Бурятмяспром» бүлгэм баабгай тэжээхэ, «БМПК» - барасуудые, «Николаевский» баһал амитадые даажа абаха. Энэ минии һанамжа. Олоной хабаадалгатайгаар музей болон амитадые хараха зохихо оршон байгуулагдаха. Барилгын компанинууд музейн дэбисхэртэ оршодог комплекснүүдые даажа абаха. Энэ хэрэгтэ олзын хэрэг эрхилэгшэдые эдэбхитэй хабаадуулха, тэдэнэй компанинуудай реклама хэгдэхэ. Жэшээ харуулан, мүнөөдэрһөө талын бүргэдые тэжээжэ эхилнэб», – гэжэ уласай хүтэлбэрилэгшэ тэмдэглэбэ.
Үбэр Байгалай арадуудай угсаата зүйн музей археологиин, эвенк, һоёд, Үбэр Байгалай буряад, хасагууд, шэмээшэгүүд болон хотын комплекснүүд бии. Тиихэдэ соёлой баялиг болохо 20-һоо дээшэ объектнүүд болон 18 мянганһаа дээшэ экспонадууд бии. Тэрэнэй хахадынь Тиихэдэ Ородой Холбоото Уласай соёлой баялигай жасада ородог юм. 1976 онһоо хойшо Үбэр Байгалай арадуудай угсаата зүйн музей байгаалиин булан ажалаа ябуулжа эхилээ. Эндэ улас дотор ажамидардаг амитад харуулагданхай
Буряад Уласай Засагай газарай хэблэлэй албанай гэрэл зураг
