​​Түнхэнэй үхибүүд шэнэ байшан соо эмшэлэгдэхэнь

Авторай гэрэл зураг

Хэрэн һууринда хүүгэдэй поликлиникэ баригдажа эхилбэ. Энэ баяртай мэдээ­сэл Түнхэнэй түб больни­цын ахамад врач Дамнин Мунконов дуулгаа.

Тус больницын эгээл хуушан байшан соо хүүгэдэй таһаг оршодог һэн. Энэ по­ликлиникэ үнгэрһэн зуун жэлэй 50-яад онуудта бариг­даа бэлэй гэжэ ахамад врач хөөрэнэ.

- Шэнэ поликлиникэ һүүлэй үеын эрилтэнүүдтэ харюусамаар бодхоогдо­но. Зосоонь бүхы хэрэгтэй оньһон түхеэрэлгэнүүд, зо­хид таһалганууд хараалаг­данхай. Үхибүүдые хүлеэн абалгын тусхай таһагуудшье түсэблэгдэнхэй. Шүдэ ар­галдаг таһаг, физиокабинет гэжэ байха, - гээд Дамнин Викторович хөөрэнэ.

Нэгэ дабхартай шэнэ поликлиникын байшан юһэншье балл хүсэтэйгөөр газарай хүдэлбэл, һандархагүй гэжэ барилгашад хэ­лэнэ. Мүн тиихэдэ байшанай газаахи байдал гоёор шэмэглэгдэхэ.

Теэд ахамад врачай хэлэһээр, барилга эршэтэй­гээр ябуулагданагүй. Шал­тагаан гэхэдэ, эмшэлэлгын газар байгаали хамгаалгын үндэһэтэнэй паркын дэбис­хэр дээрэ оршодог. Тиимэһээ энэ байдал ехэ һаад ушару­улна.

- Жэшээлбэл, 2017 оной һүүл багаар Мон һууринда бидэ фельдшерско-аку­шерскэ пункт нээһэн бай­набди. Теэд нилээд сүүдээр ябажа, дорохи газарыень һаяхан лэ өөһэдын бол­гожо шадаабди. Үшөөшье олон байшан бодхоохо түсэб байна. Зүгөөр газарай шиидхэгдээгүй асуудалһаа боложо, бидэ һанаһандаа хүрэнэгүйбди. Гүрэн түрэ мүнгэ һомолходоошье, га­зарынь данса саарһатай гү гэжэ нэн түрүүн һонирхоно, - гэжэ Дамнин Мунконов тэмдэглэнэ.

Бүхы аймагуудай больни­цануудай эд зөөреэр болон оньһон хэрэгсэлнүүдээр хан­гагдасын хэмжээн адлирхуу. Түнхэнэйшье элүүрые хам­гаалгын һалбари бусадһаа һайншье, муушье бэшэ гэжэ ахамад врач хэлэнэ.

- Арбаад жэлэй саада тээ хирургиин хоёр дабхар шэнэ байшан бодхоогдоһон юм. Ажалдамнай ехэ туһа боложо үгэнэ гээшэ. Тэндэ терапиин болон хүүгэдэй таһагууд байрлана. Аха бо­лон Түнхэн аймагуудые нэгэдүүлһэн травматоло­гиин ехэ түб манай боль­ницын дэргэдэ хүдэлнэ. Һудаһанай үбшэнүүдые ар­галдаг түбтэй болоо һаа, бүри һайн бэлэй, - гэжэ Дам­нин Викторович хөөрөөгөө үргэлжэлүүлнэ.

Аймагай һууринуудта фельдшерско-акушерскэ пунктнуудай байшангууд хуушаранхай. Тиимэһээ түб больницын хүтэлбэри Бу­ряад Уласай Элүүрые хам­гаалгын яамантай хамта тэдэниие заһабарилха бо­лон шэнээр бариха талаар олон жэлэй түсэб табин­хай. Тиигэжэ нэн түрүүн Мон һууринда шэнэ байшан ашаглалгада тушаагдаа юм. Ахамад врачай хэлэһээр, мүнөө жэлэй һүүл багаар гү, али 2019 ондо Харбяангууд һууринда шэнэ байшан ба­ригдажа эхилхэ.

Үнгэрһэн үбэл айма­гуудай больницануудта түргэн туһаламжын авто- унаануудай дамжуулагда­хада, Түнхэн аймагта нэгэ­хэн түлхюур барюулагдаа һэн. Дамнин Мунконовой мэдээсэһээр, аймаг түргэн туһаламжын унаануудаар хүсэд хангагданхай. Харин һууринуудай фельдшерско- акушерскэ таһагуудайхи булта хуушаранхай. Энэ асуудал шиидхэгдэхэ бэзэ гэжэ больницын хүтэлбэрилэгшэ найдана.