​Зунай «наадан-сурхарбаан” бүгэдэниие урина

Анна Огороднигой гэрэл зураг

Мүнөө жэлэй «Наадан-Сурхарбаан» зан­шалта ёһоороо хоёр үдэрэй туршада үргэлжэлхэ юм. Бүгэдэ арадаймнай һайндэр июниин 30-да Ивалгын ип­подром дээрэ мори урилдаагаар эхилхэ. Тэн­дээл наадан-тоглолто болохо. Үглөөдэрынь, июлиин 1-дэ, Улаан-Үдын түб стадион дээ­рэ буряад арадай заншалта наадануудаар мүрысөөнүүд эмхидхэгдэхэ. Үдэрэй 10 сагһаа бүхэ барилдаан, һур харбаан, һээр шаалган болон шагай наадан эхилхэ. Гадна буряад ша­тараар мүрысөөн Улаан-Үдэ хотын “Пионер” түб соо үнгэрхэ юм.

Э м х и д х э г ш э д э й һанамжаар, мүнөө жэ­лэй “Сурхарбаан” ула­сай бүхы аймагуудые нэгэдүүлжэ, июлиин 5-8-ай үдэрнүүдтэ Эрхүү можодо үнгэрхэ Бүгэдэ буряадуудай “Алтаргана” нааданда бэлэдхэл боложо үгэхэ юм. Юуб гэбэл, илагша­дай эрхимүүдынь “Ал­тарганада” Буряад оро­ноо түлөөлхэ болоно.

“ С у р х а р б а а н а й ” мүрысөөнүүдэй үедэ стадион дээрэ эл­дэб янзын эдеэ хоолой дэлгүүрнүүд хүдэлхэ. Мүн хүн зо­ниие сэнгүүлхэ хэдэн хэмжээнүүд дэлгэгдэхэ. Арадай заншалта наа- дануудай дүршэлтэ хэшээлнүүд, олон тоото харалган болон урилдаанууд, робото­техникын мүрысөөн, ёохор эмхидхэгдэхэ, Буряадаймнай мэдээжэ дуушад болон зохёохы бүлэгүүдэй хабаадал­гатай тоглолто-наадан табигдаха.

- Арадай уран бэли­гэй уласай түб буряад хубсаһанай үзэсхэлэн дэлгэхэ. Тэдэнииень үмдэжэ, дүрэ зурагаа буулгахада болоно, - гэжэ Буряад Уласай Засагай газарай дэргэ­дэ үнгэрдэг заншалта брифинг дээрэ соёлой сайдай орлогшо Нико­лай Емонаков мэдээсэ­бэ.

Мүн лэ юрын зон һэеы гэр хабсаран түхеэржэ һураха арга­тай. Цыренжаб Сам­пиловай нэрэмжэтэ уран һайханай музейн хүдэлмэрилэгшэд уран зурагай дүршэлтэ хэшээлнүүдые эмхид­хэхэ. Зунай найрта ерэһэн багашуулда баһал элдэб һонин нааданууд дурадхагдаха юм.

Буряад ороной залу­ушуулай үндэһэн соёлой бүлгэмүүдэй хоо­рондо “Ёохор” нааданай харалган эмхидхэгдэхэ. Тус хэмжээ ябуулга ха­тар, таабари таалган, дуу гүйсэдхэлгэ гээд хэ­дэн шатаһаа бүридэхэ. “Би шамдаа дуратайб, Буряад орон” гэһэн ха­тарай баттл эмхидхэг­дэхэ. Энэ хадаа мүнөө сагта залуушуулай дунда дэлгэржэ байһан хэмжээн гээшэ. Хатарай баттл түрүүшынхиеэ үнгэргэгдэжэ, гурбан шэглэлээр илагшад то­доруулагдаха юм.

“ С у р х а р б а а н ” үнгэргэлгэдэ мүнөө жэл 3 сая 200 мянган түхэриг һомологдобо.

- Ивалгада оршо­дог ипподромой харгы заһабарилгада мүнгэн гаргашалагдаба. Ушар юуб гэхэдэ, манай мо­рид һайн үүлтэрэй, ехэ үнэ сэнтэйнүүд юм. Урилдаха харгыень заһабарилаагүй һаа, хүлэгүүд гэмэлтэдэг ха юм, - гэжэ Буряад Ула­сай Тамирай яаманай хорооной дарга Баир Дашибальжиров тайл­барилба.

Гадна “Сурхарба­анда” бэлдэлгын хэмжээндэ Улаан-Үдын болон Ивалгын стадионууд заһабарилагдаа.