1706
Буряад Уласай залуушуулай бодолгын болон спортын яаманай хэблэлэй албанай гэрэл зураг
Байгша оной июниин 27-до, ниислэл Улаан-Үдэ хотын Зүблэлэй талмай дээрэ Залуушуулай үдэр тэмдэглэгдэбэ.
“Буряад уласай залуушуулай бодолгын ба спортын яаманай зүгһөө таа бүгэдэниие энэ гайхамшагта үдэрөөр амаршалнаб. Ажаһуугты, ажаллагты, хүсэн һанагты. Бүхы юумэн танай гарта. Һайндэрөөр”, - гээд хотын залуушуулые уласай залуушуулай бодолгын ба спортын сайд Вячеслав Дамдинцурунов амаршалба.
Һайндэрэй хэмжээ ябуулгада 100 дүүргэгшэдтэ улаан дипломууд, уласай бэлигтэй залуушуулда гүрэнэй мүнгэн шан барюулагдаа.
“2006 онһоо улас дотор бэлигтэй залуушуулые дэмжэлгын программа бэелүүлэгдэнэ. Мүнөөдэртөө нютаг можын болон федеральна хэмжээнэй мүнгэн шанда 573 залуушуул хүртэбэ”, - гээд ниигэмэй бодолгын талаар Буряад Уласай Засагай газарай юрэнхы сайдай орлогшо, уласай ниигэмэй хамгаалгын сайд Татьяна Быкова тэмдэглэбэ.
Һайндэртэ мэргэжэл дурадхаһан талмайнууд ажаллаа. Хүн бүхэн ерээдүйн мэргэжэлээ шэлэжэ абаха аргатай байба.
Үдэшын амаршалгын тоглолтодо уласай залуу дуушад, хатаршад болон ерүүл айлшадай дундаһаа “ТНТ”, “Первый” каналнуудай хатарай түсэлнүүдэй хабаадагша Аяс Допай, “Битбокс” шагналай эдлэгшэ Марк Бронштейн хабаадалсаба. Сугларагшадай урда “2018 оной оюутадай хабар” уласай хэмжээ ябуулгын илагшад талаан бэлигээ харуулба. Мүн тиихэдэ, КВН-эй Зунай Кубок, ажал хэдэг залуушуулай Кубок үнгэрһэн байна.
Тоглолтын түгэсхэлдэ сугларагшадта Зүблэлэй талмай дээрэ “Synergy Group” гэһэн гайхамшагта программа бэлэг боложо үгэбэ. Энэ программые Ород Улас дотор мэдээжэ диджей Саймон хүтэлөө.
