Июлиин 1-дэ Буряадай ниислэлэй Түбэй стадион дээрэ заншалта зунай “Наадан-Сурхарбаан” олоной хабаадалгатайгаар эмхидхэгдэбэ. Улаан-Үдэ хото суглуулагдамал команда зохёон табижа, шанга тулалдаануудта түрүүлжэ гараа. Захаамин болон Ярууна аймагай түлөөлэгшэд шангай һууринуудые эзэлжэ, мүнгэн шангуудта хүртөө.
Мүнөө жэлэй нааданууд тамирай долоон зүйлөөр үнгэргэгдөө. Бүхы буряад арад зоной дуратай мори урилдаанай мүрысөөн Ивалгын дасанай ипподром дээрэ болоо. Урилдаа харахаяа хүндэтэ айлшад ерээ. Буряад Уласай Толгойлогшо Алексей Цыденов буряад энгэртэй самса үмдэжэ, олоной һайшаалда хүртөө. Мүн хажуудань һууһан Бандида Хамба лама Дамба Аюшеев мори урилдаан тухай һонирхолтой хөөрөөгөөр Толгойлогшые гайхуулаа.
Буряад үүлтэртэ морид 9 урилдаанда хабаадажа, сугларагшадай анхарал татаа. Зэдэ аймагай түлөөлэгшэд эндэ шалгараа. Сэлэнгэ болон Захаамин аймагуудай хүлэгүүд шангай хоёрдохи болон гурбадахи һуу- ринуудта гараа.
“Наадан-Сурхарбаан” хадаа Буряад орондо ажаһуудаг бүхы үндэһэ яһатанай найр гэжэ Түбэй стадион дээрэ Буряадай Толгойлогшо тэмдэглээ.
- “Наадан-Сурхарбаан” хадаа бүхы ажаһуугшадые хамтаруулжа, элдэб үндэһэ яһатаниие нүхэсүүлнэ. Һүүлэй үедэ ганса “Эрын гурбан наадан” болоод үнгэрнэгүй. Юуб гэхэдэ, арад зоной дуратай үшөө хэдэн нааданууд нэмэгдэнхэй. Буряад шатар, һээр шаалган, гиир үргэлгэ болон шагай наа- дан оруулагдажа, бүри олон хүнүүд спортын талмайнууд дээрэ бэеэ туршаха аргатай болоно бшуу. Тиимэһээ үндэһэн энэ найр наадаяа бүри һонирхолтой, үндэр хэмжээндэ үнгэргэхэ гэжэ ходо һанажа ябахабди, - гэжэ Алексей Цыденов амаршалгынгаа үгэдэ нэмэбэ.
Мори урилдаанһаа болон шагай нааданһаа гадна спортын бүхы зүйлнүүдээр абарганууд тодороо. Гиир үргэлгэдэ сохом табан жэлдэ энэ нэрэ зэргэдэ Дэлхэйн Кубогта хүртэгшэ, Ородой спортын мастер Андрей Рассадин хүртэнэ гээшэ. Энэшье жэл тэрэ хүндэтэ нэрэ зэргэеэ алдаагүй.
Шагай нааданда хори гаран зүйлнүүд тоологдодог. Хүн зоной һанаанда таарама гурбан зүйлөөрнь мүрысөөн болоно гээшэ. “Няһалалгада” Ивалга аймагай Нима-Цырен Дандаров түрүүлээ. Гармажап Цыренжапов болон Эрдэни-Дара Доржиева гэгшэд “шүүрэлгэ” болон “мори урилдаанда” нэгэдэхи һуурида гараа. Һонирхолтойнь гэхэдэ, Нима-Цырен Дандаровай хоёр хүүгэд, Зинаида болон Тумэн гэгшэд, шангай һууринуудые эзэлээ. Жэнхэни буряад энэ нааданаар һонирхожо, бүхы сүлөө сагаа шагай нааданда зорюулдаг энэ айл бүлэ – бүгэдэндэ ёһотой жэшээ!
Ород угтай Татьяна Богданова “мори урилдаанда” хоёрдохи һуурида гаража, олониие гайхуулба. Хабаадагшадай дунда гансаараа ондоо яһанай байжа, һайн наада харуулхадань һонирхолтой ха юм.
Буряад барилдаанда олон тоото яһанай хүн зон илалтануудые туйладаг гээшэ. Хэды тиигэбэшье, олон жэлдэ түрүүлжэ ябаһан хүбүүд нэгэдэхи һууринуудаа ал- даагүй. Хурамхаан аймагай Артём Раднаев хадаа 2017 ондо абарга бүхэ болоо бэлэй. Харин мүнөө жэл өөрын шэгнүүртэ шүүбэшье, гол шанда хүртэжэ шадаагүй. Улаан-Үдэ хотын Алексей Мантатов бага шэгнүүртэ гараа. Мүн хүндэ шэгнүүртэй барилдаашадай дунда Балдан Цыжипов Ринчин Санжиевые шүүгээ. Эдэл хоёр бүхы нааданай абарга болохын түлөө тулалдаанда уулзаа. 2016 ондо абарга болоһон Балдан Цыжипов илалта туйлаа. Нааданай гол абаргые һайхан харахан үнгэтэй автомашинада һуулгажа, абаргын дүхэриг тогтоогоо.
“Эрын гурбан нааданай” бүридэлдэ ородог һур харбалгада эгээл олон хүн хабаадаа гэжэ хэлэлтэй. Эндэ эрэшүүлэй, эхэнэрнүүдэй болон аха захатанай дунда түрүүшүүл элирүүлэгдээ. Эгээл олон очко оногшод абарга болохын тэмсээндэ оруулагдаа. Һүүлэй шатада оройдоол дүрбэн хүн ороо.
Ганжур Галсанов (Улаан-Үдэ), Валерий Яковлев (Загарай) болон Ринчин-Ханда Дашамолонова (Захаамин) гэгшэд өөр өөрын бүлэгтэ нэгэдэхи һууринуудые эзэлээ.
Шанга тулалдаанай удаа Сэлэнгэ аймагай Олег Цыбикжапов абарга болоо. Ерэхэ хабар 50 наһанайнгаа ойн баяр тэмдэглэхэеэ ябаһан энэ тамиршан анха түрүүшынхиеэ “Наадан-Сурхарбаанай” абарга болоо гэхэ хэрэгтэй.
- Мүнөө һая абарга болоһомни гайхалгүй. Юуб гэхэдэ, оройдоол 40 наһа хүрөөд, номшо һур гартаа барижа үзөөб. Намтай хамта харбаһан хүнүүд олон жэл соо һорилго хэжэ ябадаг юм. Тэдэнэй дүй дүршэл ехэ. Иимэ бэрхэшүүлые илажа гараһандаа баяртай байнаб. Энэ амжалта хадаа үдэр бүри хэжэ байһан бэлэдхэлэймни дүн гээшэ, - гэжэ баяртайхан Олег Цыбикжапов мэдүүлнэ.
Захааминай һээр шааг- шад олоороо энэ жэлэй “ Н а а д а н - С у р х а р б а а н д а” шалгарһан байна. Гурбан наһанай бүлэгтэ түрүү шангуудта ганса захааминаар- хин хүртөө. 120 хүнүүд сооһоо һүүлшын шатада 4 хүн хүрөө. Захаамин аймагай Хужар болон Шара-Азарга һууринуудай тулалдаан эндэ болоо гэхээр. Оройдоол 3,9 секунда соо дүрбэн һээр хухалһан Шара-Азаргын Батор Очиров абарга болоо гэжэ тодороо. Бусад һээршэд 7 болон 8 секунда соо хухалжа шадаа. Багаһаа хойшо волейболоор бэеэ һоридог Батор сагай хэмжээндэ һээр хухалгые дэмжэнэ. Тэрэнэй хэлэһээр, мүрысөөе һонирхолтой болгоно.
- Анханай ёһо заншалнай иигэжэ һэргээгдэжэ байһандань баяртай байнаб. Иимэ мүрысөөнүүд олон шанга хүбүүдэй нэрэ нээнэ. Мүнөөдэршье бэрхэ, дүршэлтэй хүнүүд сооһоо азатай байба гээшэб, - гэжэ Батор Очиров хэлэнэ.
Буряад шатараар мүрысөөн жэл бүри олоной анхарал татана. Энэшье удаа Жамсаран Цыдыпов гурбадахи жэлээ абарга болоһон байна. Тэрэ 7,5 очко абажа, шангай һуурида гарагшадые аяар 1 оноогоор уридшалаа.
Жамсаран Цыдыпов хадаа уласхоорондын мастер гэһэн нэрэ зэргэтэй юм. Хэды тии-гэбэшье, эхиндээ хойхонуур ябаһанаа, һүүлшын наадануудта бүри шангаржа түрүүлээб гэжэ хэлэнэ.
Мүнөө жэлэй “Наадан- Сурхарбаан” Буряад Уласай байгуулагдаһаар 95 жэлэй ойн баярта зорюулагдаа.
Авторай гэрэл зурагууд
Борис БАЛДАНОВ